Ahuna Mini Hornbill Festival takok ngua mongogo

Zunheboto nung Ahuna Mini Hornbill Festival 2019 amongdang nisung telok kati mo anetba jilu ia sayur. 

Dimapur, November 15 (TYO): November 15, 2019 nü District Sports Council Ground, Zunheboto nung Ahuna Mini Hornbill Festival 2019 takok ngua tembangogo.
Anogo asemnü benjongmong ya district administration-i Sumi Hoho den yaritepa ayongzüka among.
Iba sentong nung Sumi Hoho Tir Hekhushe Shikhu-i Ahuna teratet metetdaktsü, Lotha Hoho Tir, Ao Senden Tir, ENPO Tir aser SKH Tir Kashito Yepthomi nungertemi tayongzükba o jembi.
Sentong nung Addl. Deputy Commissioner, Zunheboto, Hito Sema-i anküp tepela o jembidang taküm Ahuna benjong takok ngudaktsüba atema teyariteper ajak dang pelaba metetdaktsü.