AIADMK-i Sasikala dang party general secy akumtsü ajungshir

Chennai (Tamil Nadu), December 10 (Agencies): AIADMK party nung lenirtemi V K Sasikala dang party general secretary menden atsüngtsü ajungshiogo, ta osang angazüker.
AIADMK party-i party general secretary tasen ka shimtsü, ta party nung lenir tain, C Ponnaiyan-i tanü metetdaktsü
Iba osang jangjaja Ponnaiyan-isa, AIADMK-i democratic yimya nung inyaktsü aser general secretary election agitsü atema senden ka ayongogo, ta ashi.
Tanep party lenir aika Sasikala’er kidangi oa la ajurua liasü, koba ajanga party general secretary mendenji la nem agütsütsü südi ta bilemer.
Tawa Sasikala den senden ka amenba dak sentakba nung tasüngdangba ka langzüdang Ponnaiyan-i, “Laji party nung tongtibang züngsem ka masü no? Iba (la ajuruba) nungji kechi tai ali?” ta asüngdang.
Party otongdar Ponnaiyan-isa, sorkarji Paneerselvam-i ketdangser aser AIADMK ji ketdangpurtemi ketdangser, ta ashi.
“AIADMK ya level balala nung party tentettemi ketdangser aser Sasikala ji tongti züngsem ka lir,” ta Ponnaiyan-isa shisem.