AIADMK MLAtemi pei tangatetba nung vote agütsütsü: TN CM

Chennai (Tamil Nadu), February 09 (Agencies): Brihostibarnü Tamil Nadu Chief Minister, O Panneerselvam-i, party MLA temi pei tangatetba nung vote agütsütsü atema maongka angutsü, aser pai majority angutsü, ta metetdaktsü.
Panneerselvam-isa, paibo taoba state chief minister, J Jayalalithaa asüba nung melung malemtsüsa kecha mali, ta metetdaktsü.
Tamil channel ka den interview agidang Panneerselvam-i pai MLA kwi vote angutsü imlar ibajibo mashi, ajisüaka pai assembly nung züngsem sayutepdang pai majority angutsü, ta metetdaktsü.
Bodhbarnü Panneerselvam-i, tang teinyakdak Supreme Court obendanger ka leniba nung commission kati Jayalalithaa asüba kulitem bushisüngdangtsü, ta metetdakja liasü.
J Jayalalithaa Apollo Hospital nung anogo 75 tashi amungba sülen yaküm December 5, 2016 nü asü, iba sülen la asüba nung melung melemteti bushisüngadngtsü atema takhangba agüja arur.
Panneerselvam-i February 5, 2017 nü Chief Minister menden nungi alutsü sodi meshia liasü aser ibaji Angh, C Vidyasagar Rao-i agizükogo, ajisüaka tang pai Chief minister menden bena lir.
Iba anogo nungjisa AIADMK General Secretary, VK Sasikala chief minister akumtsü atema lenmang lapokja la legislature party lenir shim.
Angh-i Panneerselvam dang, khenpiga atema Chief minister menden maneni bena atatsü asüngdang.
Mongolbarnü Panneerselvam-i Jayalalithaa indang memorial nung minute 40 shi sarasademba sülen pai, pa Chief Minister menden nungi anentsü aser Sasikala legislature party lenir akumtsü atema pa dang rongshia liasü ta metetdaktsü.
MLA timba ka Sasikala den lir aser MLA 5 shi Panneerselvam den lir.
Ano külen DMK Tir, M.K. Stalin-i sangdong ka ajanga, vote agütsütepbaji assembly nung agitsüsa Angh-i inyaktsüla, ta metetdaktsüogo.
Paisa, AIADMK MLA tem resorts balala nung lir, aser ibaji memelatsüla, ta ashi.