New Delhi, December 07 (Agencies): BJP lenir, Subramanian Swamy-i, AIADMK party loksatsü, kechiyong J Jayalalithaa-i kanga melung lemteta alila, Sasikala Natarajan-i party ketdangsütsü aser tang tasen shimba Chief Minister, O Panneerselvam nem sademsadema yimsü mesüdaktsütsü, ta ashi.
“AIADMK ji longjema malitsü. Iba tentet nung Sasikala Natarajan tekolak asütsü aser Panneerselvam nem sademsadema yimsü mesüdaktsütsü, aser tatemsabo iba menden (Chief Minister) atema lai lar kinünger rongnungi ka shimtsü,” ta Swamy-i ashi.
BJP lenirsa, Party nung Panneerselvam nungiter junga mali aser Sasikala dak yimtenren sempet mali, ta ashi.
Hombarnü Tamil Nadu Chief Minister, J Jayalalithaa asüba osang sangdongba sülen ghonda ana tsüngda lai kanga melung lemteta alisang, Panneerselvam Chief Minister menden atema tenangzükba agia liasü.
Tamalen Jayalalithaa anaben tashi ken o akaba mapang nunga Panneerselvam-i Chief Minister mapa anaben tashi bena liasü.
September 22, 2016 nü Jayalaithaa Appolo Hospital-i anir aoba sülen Finance minister, Pannerselvam nem la indang portfolios agüja liasü.
You must be logged in to post a comment Login