AIADMK telok ana longjemogo; Panneerselvam deputy CM shim

Chennai (Tamil Nadu), August 21 (Agencies): Tamil Nadu nung AIADMK telok ana lemsar ita trok aruba sülen Hombarnü telok ana longjemogo; iba telemtetba dak sendakba nung K Palaniswami maneni chief minister asütsü aser O Panneerselvam deputy chief minister asütsü bangjem.
Panneerselvam AIADMK coordinator asütsü aser Palaniswami co-coordinator asütsü. Sasikala party general secretary shimba nungi mangatettep adoka telok ana küma lemsa aser hopta ishika telok ana nungi lenirtemi longjemtsü atema jembia aruba sülen tanü ka küma longjemer.
Ajisüaka tang jail nung alila, Sasikala pusemertembo la densa lir.
Tanep Palaniswami tama party office tonga aru aser tatsüka lir Panneerselvam office tonga arua liasü. Iba mapang nung party nung inyakertemi pa pelaa agizük. Panneerselvam office tonga marudang pa pusemer P Munusamy, Rajya Sabha MP V Maithreyan, senior lenir C Ponnaiyan aser taoba mapang MP, P H Manoj Pandian nungerbo office tonga arur liasü.
Taküm February ita nung Panneerselvam-i Sasikala anema apusoba sülen telok ana aküm. Taoba chief minister Paneerselvam-i, pa CM menden nungi kangshia aludaktsü, ta ashi. Panneerselvam treasurer menden nungi agienba sülen AIADMK (Puratchi Thalaivi Amma) telok tenteta liasü.
Iba sülen Sasikala-i Palaniswami Legislature Party lenir shim, kechiyong la tepoukdaki aitsü atema Bengaluru-i aotsü liasü. Pei dak mapet rongsen bendenba ken o nung aija tang la tepoukdak lir.
Iba sülen Palaniswami chief minister aküm.
Taküm April ita nung Tamil Nadu Cabinet-i Sasikala aser Dhinakaran na atsüngoktsü atema jembia liasü, aser menden 234 aliba assembly nung MLA 122 aliba telok nung Palaniswami lenir aküm.
Ano O Panneerselvam telok nung pa dena MLA 9 liasü.
Taoba Chief Minister, asür Jayalalitha’er constituency, RK Nagar nung by-election agiba sülen taküm April ita nung Palaniswami aser par Cabinet züngsemtemi Dhinakaran anema nokdak. Taküm April ita nung Dhinarakan-i Election Commission ketdangsertem sübokrem agi mesüzüktsü merangba atema pa nem tai tonglokja liasü.
Maneni August 10 nü Dhinakaran anema senden ka amen, aser iba senden nung Palaniswami-i, pa shimbaji party ozüng alema lir, ta sangdong, iba sülen telok ana longjemtsü atema sabang lapoka liasü.
Sasikala party nungi jendoktsü: AIADMK MP
Ano külen tanga osang ka nung, AIADMK general secretary, V K Sasikala jendoktsü atema general council senden ka amentsü, ta party lenir aser Rajya Sabha MP, R Vaithilingam-i metetdaktsü.
Tanü party headquarters nung jembidang Palaniswami telok nung lenir, Vaithilingam-i, Sasikala party nungi jendoktsü atema inyaktsü, ta metetdaktsü.
Taoba mapang minister, Vaithilingam ya party deputy coordinator shimogo.
Chennai nung osangbenertem den jembidang AIADMK lenir, Avadi Kumar-i, general council-i Sasikala shim, anungji la party nungi jendoktsü atema-a gereral council-isa telemtetba agitsü, ta metetdaktsü.