Aiatai Foot Kill Road

– T. Watikaba Jamir, Dimapur.

Alima ajunga nung meimchir nüngdakba aikasa lir. Item ajak rongnung lenmang yasa tongtipangtiba. Nagaland nung Rs. 4127 crore indoka gari lenmang yanglutsü asoshi Union Minister for Road Transport, Highway Nitin Gadkari-i online ajanga project 15 inyaktsü atema 5th December 2020 nü long azüngtsüogo. Ano pa-i sa ashiba agi tesüiba küm 6 tsüngda Nagaland nung National Highway renlokdaktsütsü aser tajungba kümdaktsütsü asoshi project 55 atema Rs. 11,711 crore sanction sütsüba metetdaktsü.
Nagaland nung lenmang yanglutsü asoshi Centre nungi sen crore sa crore yokaka Foot Hill Road asoshibo tenüng mait senzüka doktsüba agi Dimapur Ao Lanur Telongjem (DALT)-i 9th Dec 2020 nü osang kaket nung yamai zülu, “Foot Hill Road meyangluba ajanga timtim ajuruba districttem nungi MLA 48 lir saka kanga dang taoksatsükaji tawa Mega Project sangdongba mapang Foot Hill Road medensemba atema MLA 48 rongnungi katia ola madok ta DALT i metetdaktsü”. Ibai shidi süra nübener tebu kati pei kibong, pei jala jabaso ayatzüra memetet aser süoshi maki mangsa kima-yimdong nung tangar menüdong kümdaktsüba ama ka kumogo.
Constituency 48 nung aliba nübortemji ajakbo memeteter aser tamaji dangbo masü, tanü alima nung kechisa ataloker ibaji second nung metetadoker, yamaji Government sendong aser telemtetba ajunga yakta dang sangdonger aser idangjisa nüboria meteter, Nagaland asoshi lenmang atema Central Government-i sen-sa-sen yokaka State Government-i Foot Hill Road atemabo züngshia mali, tazungla kümdaktsügo. Item osang angashia nübortemi pei yimsüsür nüng asentsü tenzük. Ano yimsüsürtemia nübor nüngnüngba ola angashia Chief Minister den ajurua jembitsü lemtet.
23rd Dec.2020 anepdang osang kaket nung Aoer MLA temi Nagaland Chief Minister dang pelar ta front page nung zülu tulu agi zülur angu. Asüji tanepbo ya kechi atema Chief Minister dang pelar-ar reprangdangti sür zünga ao nung Chief Minister-i parnok pelatsüsa o tajung aika shia tekaratiba nung iba Foot Hill Road anepalutsütsü nangzük ta zulua angu.
“Tizit nungi khelma tashi yangluba Foot Hill Road ya Nagaland nung gari lenmang rongnung tongtipangtiba lir, taoba mapang ni Chief Minister inyakdang iba gari lenmang yanglutsü tenzük, saka ni MP inyaktsü Delhi-i aoba sülen iba lenmang nung temulung magatsütet, saka dang nungi ni yariteptsü” ta Chief Minister Neiphiu Rio-i Aoer MLA tem dang nangzük. Aoer MLA tem pelabaji ibaji liasü.
Foot Hill Road ya Aoer kija indang lenmang masü, tesüiba mapang lenirtemi nükla aser alizüng tulu yur iba Foot Hill Road ya survey asüba sülen 1974 nungi yanglutsü tenzükba tangibo nübor ajak anisüngzüka senzütettsüba sürnung tazü. Nübor nüngdak rongnunga nüngdaktiba mapa ka tamakok aludaktsübaji shir government, shir mapang, shir yimsüsüri pei nübor senzüka doktsüü Tepang o-bo tajung saka mapa mali yimsüsürtemi Naga nübor teimbaka küm 47 dak tema ashioktsüogo. Anungji nübortemi tongtipangsa asen Ao lima kinük ajaklen yimden sapang, Student, Arogo, Watsü telok balala ajak nungi ara atua iba lenmang atema jembitsüla aser osang kaket nung tangsa tang inyakjangta akangtsüla.
Foot Hill Road ya kangabo tongtipang ka masü asübo 2019 küm ABAM ajanga State Govt. nem Foot Hill Road yangluba nung amshitsü sen lakh semer trok, Meyi tenemser trok, Noklang ana ser tir ana, ibato magatsüla. Saka onsara tongtipang aser nüngdak rongnunga onsara nüngdaktiba asüba agi Govt. aser nübor ajak molung ajungmesotsü agatsü.
Naga nübor kanga akia teimba alibalen tongtipang mapa ka küm paikati senzüka doktsüba ya telong nung langka tai alitsü südi. Asen temang tenük telen kar nung komo tamajung kar adokra komo dangji kanga akia tuluba aser tesashiba atahlong ka temang nungsa adoka atar, yamaji asen Aoer tzükong troksanger rongnungi kari memolunger asüü Mesüra Govt. aser yimden nung tongdi nisung nübor asoshi temetsüdaktsü long ama kar ali asüü Mesüra Naga kin rongnungi shir kin-i anema apusorü Mesüra Eastern pur rongnungi kin kari onokpo matentsü ta shia ali asüü Yamaji ka masü asü nungbo, Foot Hill Road ya yakta yongi renemer lila, aser asen Naga nunger Assam nunger nem dang amaibo mezüngmeshi mesüdaktsüla.