AIBA-i Mary Kom par ambassador shimer

New Delhi, April 15 (Agencies) : Brehostibar nü India’er tetsür tsüngteper mongin, MC Mary Kom-i ano naroküm tajung ka nguogo aser ibaji International Boxing Association (AIBA)-i taruba World Championships atema la ambassador asütsü shimtetba lir.
Taruba World Championships atema AIBA-i ambassador 8 shimtetba rong nung Mary Kom-a densema lir.
AIBA-i la shimbaji konang ulura lir ta, World Championship gold medal punguben tashi angur, Mary Kom-i metetdaktsü.
“India tsür ka ama iba ya ni atema tetushi tulu ka lir. Iba naroküm ajanga ni international boxing atema shilem agitsü aser iba tetushi ya nisung ajak nembo magütsür” ta lai ashi.
Taküm May 19 nungi 27 nü tashi Astana, Kazakhstan nung World Championship alitsü aser iba nung Mary Kom-i takok angutsü atema meranger.
Manipur tsür, Mary Kom ya World Championship nung otsüsür ka lir aser lai gold medal aiben anguba atema AIBA-i la nem ‘Magnificent Mary’ ta tenüng jalokja lir.
AIBA-i ambassador shimteter rongnung Great Britain nungi Nicola Adams, Team USA nungi Marlen Esparza, Brazil nungi Adriana Arauja, Bulgaria nungi Stanimira Petrova aser Morocco nungi Khadija Mardi nungertem dena lir.
Ano, ambassador inyaktsü atema tetsür ketdangsertem nungi Algeria tsür, Kheira Siki Yakoub aser Canada tsür, Jennifer Huggins na shimogo.