AIBA World Qualifiers: Vikas o Manoj nati bronze agizük

Baku, June 24 (Agencies): International Boxing Association (AIBA)-i ayongba World Qualifying Tournament semifinal nung India nunger tsüngteper, Vikas Krishan aser Manoj Kumar nati tanü, Hokolbar nü tamakok anguba osang jangjaogo.
Vikas-i temang mejungi küma metsüngteptettsüsa akümba yong Turkmenistan nunger Achilov Arslanbek-i Vikas madak temang touzük seret 75 taret tetoktepba nung takok angu aser Britain nunger Pat McCormack-i points 3-0 agi Manoj seret 64 taret shilem nung tsükdaktsü.
Tenati tanü tamakok anguba ajanga tan asayamong nung bronze medal ang agizüktsüsa jenjang ngua liasü.
Ano, Russia nunger Petr Khamukov-i Sumit Sangwan seret 81 taret quarterfinal asaya nung tsükdaktsüba yong Sumit-i ayuba Rio Olympics nung shilem agitsü mangdang samatsüsa jenjang ajurua tanü liasü.
Ano külen, WBC Asian takokba agizüker, Neeraj Goyat densema, India nunger professional (Pro) tsüngteper 3 tashi AIBA-i pro tsüngteper atema ayongba Olympic Qualifying asayamong nung shilem agitsü asoshi tenüng züluokba osang angazükogo.
Venezuela nung taruba July ita 3-8 nü asayatsü ayongba tetoktepba nung Neeraj-i temang touzük seret 69 taret shilem nung tokteptsü aser külem sensopur, Gaurav Bidhuri aser Dilbag Singh nati temang touzük seret 52 taret aser seret 81 taret shilem nung tokteptsü renema lir.
India’er tongti tsüngteper, Vijender Singh-ia seret 75 taret shilem nung tokteptsü bilema liasü saka Vikas-i semifinal asayatsü jenjang ngua Rio Olympics nung shilem agitsü temeten nguadokba yong Vijender-i Olympics nung shilem agitsü temeten bushitsü maongka monguteti süidaktsüogo.