AIBA Youth Women’s World Boxing Championship Assam nung alitsü

Guwahati, Nov 6 : Hombarnü, Guwahati nung  ABIA Youth Woman’s World Boxing Champions logo, Assam Chief Minister Sarbananda Sanowal aser Indian Boxing Federation President Ajoy Sing nati lapoktsüba noksa nung angur.

Guwahati, November 06 (Agencies): International Boxing Association (AIBA) indang Youth Women’s World Boxing Championship ya Guwahati nung November 19 nungi 26 tashi alitsü, aser iba asayamung nung linük 39 nungi registered boxer 193-i shilem agitsü, aser iba asayamung ya India nung tang mezüngbuba alitsü, ta Assam Chief Minister Sarbananda Sonowal-i tanü ashi.
“World-class tournament aika Guwahati nung mapang shia ayongzüka munga arudagi aser tarutsü nunga ano maneni iba amala asayamung aika yimti nung alitsü,” ta iba championship indang official logo, mascot aser naklo ken sayaba mapang Sonowal-i ashi.
2017-18 mapang sorkari asayaba moapu 500 yanglutsü aser state-of-the-art sports stadium tem yakta Dibrugarh, North Lakhimpur aser KAmrup nung aliba Sualkuchi nung yanglutsü, ta pai ashi.
State sorkar indang sentong ya asaya balala indang sempet aketertem kinük-kisang ajunga nungi bushiteta national aser international jenjang nung takok ngutettsü asoshi tim lenmang sayutsü lir, ta Sonowal-isa ashi.
Iba asayamung ya Buenos Aires, Argentina nung 2018 küm Youth Olympic Games agitsü aliba atema qualifying competition ka asütsü, ta AIBA ajanga sangdong ka nung ashi.
Iba championship ya 2020 Tokyo Olympic Games nung tetsür tsüngtepertem shilem agitsü atema jenjang bushiba tetenzüker asütsü, ta kasa sangdong ajanga ashi.
Iba asayamung atema Olympic bronze medal angur M C Mary Kom, state nungi boxer Shiva Thapa aser kentener Zubeen Garg nunger ya brand ambassador shimogo.