Aibelener ka asoshi Cong lenir kati passport meshi: Swaraj

New Delhi, July 22 (Agencies): Mangatettep ken o tulu ka adoktsüsa tanü External Affairs Minister Sushma Swaraj-i, Coal scam ochimashi ken o nung aibelen tongloktsür alisang, Santosh Bagrodia atema Congress lenir kati la dang diplomatic passport ka meshitsü, ta shiogo.

Ajisüaka Minister Swaraj-i Congress lenirsang tenüngjibo mashi, kechiyong lai pa tenüngji Parliament nungang ashitsü, ta shiogo.

“Coal scam ken o nung aibelener Santosh Bagrodia nem diplomatic passport agütsütsü atema Congress senior lenir kati kü dang kanga mepishiogo,” ta Sushma-i ashi.

“Tenüngji ni Parliament senden nungang metetdaktsütsü,” ta Swaraj-i ashi.

Taoba mapang minister of state for coal, Bagrodia yashi coal scam ken o nung Special Court kati jaoka liasü. Iba ken o ya Maharashtra, Bander coal block AMR Iron aser Steel Pvt Ltd nem lemzüktsüba nung sentaka lir.

India sorkari taoba mapang IPL Mendenbuba Lalit Modi indang passport thinentsür liaka Swaraj-i pa indang passport bushiba nung yariba ken o nung Congress-i anir opposition party temi la minister menden nungi aludaktsütsü akhanger.

Yashi iba ken o nung Congress-i Rajya Sabha nung takhangba agüja rongrong adokdaktsüba ajanga Parliament senden junga mekatetti liasü.

Senden nung sorkari, Swaraj-i sangdong ka agütsütsü iba sülen o atsüteptsü/tokteptsü ta ashi saka Congress-i la tama minister menden nungi alutsüla ta tekong kanga meranga noktak.

Ano külen tanga osang ka nung, taoba hopta tashi Sushma Swaraj indang bio nung “Foreign Minister, Government of India” ta liasü saka tangbo ibaji agienogo.

May 2014 nung Swaraj-i iba menden agizükba mapang nungi minister indang Twitter bio ji kodanga tazüngla (tawa) maliasü. Tesüiba küm ka nung Swaraj aser la den inyakertemi Twitter kanga amshia aruogo.