AICC-i elections atema jelia renemshir

New Delhi, December 21 (Agencies): Tawa Gujarat election nung Congress-i tamakok nguaka parnoki menden aika nung takok anguba ajanga tasüitshir Congress bangdak lenirtemi sangküm Karnataka, Meghalaya, Nagaland aser Tripura state assembly elections atema kanga jelia maparen tenzükogo.
Karnataka aser Meghalaya na nung Congress sorkar lir, aser party-i Nagaland aser Left Front-i yimsüsüba Tripura nunga takok angutsü nükjidong yur maparen tenzüker.
Osang ka ajanga ashiba agi, sangküm January ita nungi tenzüka Congress Tir Rahul Gandhi-i item states aiben semdangtsü atema All India Congress Committee (AICC)-i sentong yangludar.
AICC manager temi item states nung lenirtem dang election nüboyim sentong ayongzüktsü atema tongtepratepa jembidar.
Item states nung candidates mesangdongdangyongi AICC-i constituency sasep nung survey agitsü aser constituency shia nung party tashimait alibatem bushitsü tuyuogo.
Pradesh Congress Committees (PCC) danga parnok kübok aliba committee balala dang tetemsü candidates asadanga shimer benoktsü tuyuogo.
AICC-i item states nung lenirtem den senden aika amentsü atema yangludar, aser party sasep nung tashi itshitsü atema inyakdar.
Karnataka nungbo Congress-i BJP den kanga atongtepa tokteptsü.
Tang linük nung Congress-i yimsüsüba states aser UT ji Karnataka, Punjab, Meghalaya, Mizoram aser Union Territory of Puducherry dang lir, anungji party kanga asentenshir inyaktsü nüngdaker.