AIDS Samatsütsü Alizüng

Tawa NACO indang HIV/AIDS Estimations 2017 report ajanga, India nung HIV agi shiranger nisung lakh 21.4 lir aser item rongnung HIV keta alir tanur den tainlonglong (arishi küm 0-19) 120,000 shi lir, ta sangdongogo. Iba dak alia HIV metendanger ano nisung kwi dak iba tashidak keta alitsü ta bilemer. National AIDS Control Organisation (NACO)-i sangdongba osang ya shidak süra 2030 küm tashi nung India-i HIV tongbang akoktsü alizüng ayubaji tamakoktsü asütsü, ta bilemer. 2017 küm kija nung HIV tashidak menazüker nisung 87,000 shi liasü aser AIDS dak sendakba agi asür nisung 69,000 shi liasü. Ano no menden nung bena aliba tanur nem HIV memenaloktsütsü atema tetsür 22,675-i  Antiretroviral Therapy (ART) nüngdaka liasü. Ano külen UNICEF-i, HIV nokdangtsü atema meinyaktetra 2030 küm tashi nungbo alima nung AIDS agi anogoshia tainlonglong 80 shi asutsü, ta asadangtetogo. UNICEF report ajanga ashiba agi, tang alima nung arishi küm 0-19 tsüngdapur million 3 dak HIV keta lir, ajisüaka alima linüktemi alizüng yur inyakra 2030 küm tashi nungbo nisung million 2 HIV menatsü aliba nokdangtettsü; iba tetezü HIV nokdangtsü atema inyaktsüla, anepalutsüla, treatment services agutsütsüla aser tendangtsütsüla. 2017 küm India nung HIV jenjang asadangra 2015 küm nungi tenzüka 2017 tashi nung temelenshi kecha balaka mangur, kechiyong 2015 küm India nung HIV tashidak menar 86,000 liasü, kasa küm HIV agi shiranger nisung lakh 21.17 liasü aser 2007 küm nungi nisung lakh 22.26 shi liasü. India linüki 2030 küm tashi nungbo HIV tashidak samatsütsü nükjidong yua lir, ajisüaka tang ama jenjang nungbosa iba nükjidongji mataloktsü. HIV/AIDS control programme ajanga 1995 küm nungi tenzüka iba tashidak menaba kanga ajemdar aser 2005 küm nungi tenzüka AIDS dak sendakba agi asüba kanga ajemdar, saka imlaba ama majemer. India nunga NACO ajanga ashiba agi, HIV/AIDS mesen aketer teimbaka pei kinüngbo dak nungi menabatem lir. Atangji, AIDS aketer teburtemjia tangar atema lendong, saka tetsürtem dak iba tashidak mesen aketbasa lendong taketba kümogo, kechiyong AIDS aketer tetsüri asoba tanur dak iba mesenji menaloktsütsü kanga melar. Joko, küm aika AIDS tashidak tsübudakja nüburtem nem akok tashi tangatetba agüja arur, saka nübortemi mekümdangba ajanga HIV aketer aser AIDS tashidak agi shiranger timba-timba akümer. Nagaland State AIDS Control Society ajanga putetba agi, Nagaland nung ‘People living with HIV’ (PLHIV) aser AIDS agi shiranger nisung 22,878 lir. Nagaland nütsüngji lakh 20 shi dang lir, aser 1999 küm nungi 2018 küm tashi nung azü sample 10,16,700 tendangba nungi nisung 22,878 dak HIV putet. State nung iba tashidak menar shilem 91, talisa arishi küm 25-34 tsüngdapur mashimashie shi nung medemba ajanga lir. State nung nisung 22,878 nungjagi ART agitsü atema nisung 16713-i register süogo, ta NSACS-i metetdaktsüogo. Tang tashibo molungtet telok (NGO) aikati HIV/AIDS aketertem anepalutsü aser iba tashidak nokdangtsü atema nisung ajak nem tangatetba agüja inyakba angur. Ajisüaka lanuri dang masü saka kibong kümer alir tetsür-tebur ajaki pei sasa kümdangbajisa tajungba asutsü. Ano tebur dang nungi tetsür tali kümdangtsüba kaji- kibong kümer alir tetsütem aika dak iba HIV/AIDS mesen agi tonga alinungji, tetsü dak nungi tanur dak iba tashidak mesen memenatsüsa anepalutetra, iba jagi tarutsü lanurtem aika iba tashidak nungi kümzüktettsü.