Aieni aoba nung tetsükdaktsü (T.Ken 114:1-8)

Nai tzüyim jena aoba ngua lir ma? Nai tenemtem san tepung ama pungtenba, tenem tilatem san chanu ama kechi agi pungtendaktsü ngua lir ma? Ibaji Israel Ijip nungi anitetba ken züluri tatsü agi ashiba lir. “Tzüyim agi angu aser jena ao; Yordani meyipa ao… Na alima, Kibuba tsüngdang, Yakob Tsüngrem tsüngdang atentenang. Shibai lung agi tzütu kümdaktsü, züpu lung agi tzüpokdak kümdaktsü” (t.3,4,7,8).
Ken züluri Tsüngremi Temerem Tzüyim lapoker Israel nunger ali takong nung jajadaktsüba ajanga adokdaktsüba ashir. Pai kinji Yordan Ayong ali takong nung jaja tenangzükba Limai anir ai. Pai parnoki lenmang nung ajuruba indang ashi, kodang parnok tzüra. Tsüngremi lungji tzütu kümdaktsü.
Item tajangshibatem nungi asenoki kechi angazüker? Tsüngrem asen taküm timtem aser koda masü tia ajak nung yarir. Kodang nai ne timtem Pa nem agütsür, Pai yarir. Pai kechi inyaker? Ken ken Pai tenokdangtsüji agientsür. Teimla makadak ajak nung Tsüngrem asenok den lir. Israel nung temerem Tzüyim nung koda teyimla makai liasü! Tsükchir sepoytemi parnok sülen liasü; arem, parnok meketa liasü; parnok jakdang tzüyim liasü. Saka jentettsü asoshi Tsüngremi lenmang lapoktsü.
Ken ken tenokdangtsü adoktsür- tenem “tilatem” aser tenem “tulutem” Pai itemji shiruru ama jena odaktsür. Pai ano tenokdangtsüji temoatsütem kümdaktsür. “Pai lungtemji tzütu kümdaktsü aser züpu lung tzüpokdak kümdaktsü” (t.8). Tsüngremi ne timtemji magienra aser meindoktsüra itemji temoatsütem kümdaktsür.
Ne timtem nung Tsüngrem dak amangang. Pai na teimla makadak yaritsü, tenem, tarok ajak nung yaritsü.