AIFF-i FIFA Tir tasenba, Infantino den amaliteptsü yongyar: Patel

xaccxccsNew Delhi, February 27 (Agencies): All India Football Federation (AIFF)-i alima ajunga nung football asayatsüren ketdang asür, FIFA Tir tasenba, Gianni Infantino den aroki amalitepa inyakba ajanga India nung football asayatsüren temaba jenjang nung ajungkettsütsü yongyaba olen ka AIFF Tir, Praful Patel-i tanü, Honibar nü metetdaktsüogo.
Swiss-Italian nunger Infantino-i yashi, Hokolbar nü amenba Extraordinary FIFA Congress nung Asian Football Confederation (AFC) Tir, Sheikh Salman bin Ebrahim Al Khalifa den temaba jenjang ngua FIFA Tir tasenba akümtsü jenjang ngua liasü.
Ochimashiba ken o nung aitsüba sülen mezüng football asayatsüren nung küm 8 tashi shilem magitsü aser tesülen kasaji küm 6 küma ajemja merenshisang, Sepp Blatter melenzüka Infantino-i tan FIFA Tir menden benoker lir.
Infantino-i yashi Tir election nung vote 115 ngua temaba jenjang angu aser pa sülen anidaka, Salman aser Jordan Football Association (JFA) Tir, Prince Ali bin Hussein nati tanabuba aser tasembuba jenjang ngua liasü.
Yashi FIFA senden nung Patel-i India tenüng nung shilem agia FIFA Tir menden benoktsü jenjang tajung anguba atema Infantino den tepela lemsatepa liasü.
Kasa sentong nung AIFF General Secretary, Kushal Das-ia shilem agiba osang jangjaogo.
Ano külen, alima ajunga nung football asayatsüren temaba jenjang nung ajungkettsütsü tenangzükba olen ka arishi küm 45 tain okatsür, Infantino-ia FIFA Tir menden abentsü jenjang anguba sülen metetdaktsüogo.

You must be logged in to post a comment Login