AIFFSO Nagaland-i 74 buba Quit India Movement amung

August 9, 2016 nü Hotel Japfu Kohima nung North East, Nagaland State Unit, District Unit nungi AIFFSO ketdangpurtem agiba noksa ka angur.

Kohima, August 9 (TYO) : All India Freedom Fighter Successors’ Organization (AIFFSO) Nagaland State Unit ketdangsüba nung Nagaland nunga 74 buba Quit India Movement bilemteta sentong agi.
Hotel Japfu nung ayongzüka agiba sentong nung Secretary AIFFSO, North East Chapter, Neilo Koza-i ashiba agi, August 8, 1942 nung Mahatma Gandhi-i Mumbai nung British  nunger India nungi aotsü atema takhangba agüja Quit India Movement tenzük.
Iba movement dang Civil Disobedience Movement ta aja aser congress lennir tejen aika tepuokdak ayu, linük tesem balala nung lokti sentongtem agitsü tenzük, bomb amshia amak aser ozüng alema mapa inyaktsü tenzük, ta Koza-isa metetdaktsü.
Iba movement ajanga takok tulu angu. Iba sentong ajanga India nunger longjem aser 1944 küm India nungeri British yimsüsüba ajembang. 1944 nung Mahatma Gandhi tepuokdak nungi chiokba sülen pai anogo 21 lumia lungkak ait aser World War-II tembang tashi nung alima balaka melenshi aser India-i nüjiso meshiba süokia ia agizüktsüsa aküm, ta Secretary AIFFSO, North East Chapter-isa ashi.
Sentong nung President AIFFSO Nagaland State Unit Zeliezhu Angami, Advisor AIFFSO, North East Chapter R. Sopu Angami aser Executive Member Mohokiya Apon Rengma nungeria o jembi aser AIFFSO, North East Chapter General Secretary Guolhuolie Rio-a aden.
Sentong nung mendenji Vice President, AIFFSO, Nagaland State Unit Vingol Chaya liasü, Information Secretary, AIFFSO, Nagaland State Unit Y. Taiwang Konyak-i temoatsü meshia sarasadem aser General Secretary, AIFFSO, Nagaland State Unit Kikrovi Sakhrie-i tesentepertem pela agizük.