AIFFSO Nagaland State Unit senden kaogo

Kohima, July 15 (TYO): All India Freedom Fighters’ Successor Organisation, AIFFSO Nagaland State Unit mezüng senden aser seminar tanü Kohima nung kaogo.
Iba sentong nung jembidang North East AIFFSO Advisor aser Nagaland Contractors’ and Suppliers Union Tir, Pele Khezhie-i, joko state nung tentet aika kümogo saka iba tentet yabo British nunger yimsüsüba mapang nung rarartem welfare atema asütsüla, ta ashi.
Paisa iba tentet ketdangsertem dang, iba tentet tashi itta alitsü atema aser tamang katettsüsa longjemer inyaktsüla, ta ashi.
Tentet ketdangsertemi yimtsüngtem tashi oa nüjiso atema rarartem jangjatsüla aser Centre sorkari agütsüba pension aser tanga schemes nungi tajangzük agidaktsütsüla, ta paisa ashi.
“Asenok Naga nunger süaka, asenok Indian Union kübok aliba mapang tashibo Centre nungi anguba tajangzük ajak agitsüla,” ta paisa metetdaktsü.
North East AIFFSO tatong Tir, R. Sopu Angami-i, 2nd World Way matongdang aser India nunger nüjiso mangudang Naga nungerji British kübok liasü, saka Naga nungeri British imperialism policy, talisa sarutem aser kangshia mapa inyakdaktsüba memulungi liasü, ibayongji British sepaitema asü aser yiru. British yimsüsüba nungi pei sobaliba wazüka ayutsü atema Naga nungeri rara aser taküm bendanga agütsü, ta ashi.
Anungji item nüjiso atema rarartem, parnok senmangertem aser kinüngertem nem-a India tesem tangalen anguba den kasa tajangzüktem aser welfare schemes maongka agütsütsüla, ta paisa shisem.
NEAIFFSO secretary, Neilo Koza-ia, AIFFSO züngsem kati sen 20,000 tashi Central Samman Pension angutsü aser angati train service anguba den külemi Public Sector Undertakings nung mendenbuba mesüra züngsemtem akümtsü aser Rajya Sabha züngsem den Angh tashia akumtsü akok, ta metetdaktsü.
Paisa, tang Nagaland nung züngsem 73 lir saka ano parnoki Centre dang nungi tajangzük kecha ngua mali, kechiyong state nung iba tentet ya tawa ang tentet, ta ashi.
Kasa sentong nung AIFFSO Nagaland Tir, Zeliezhu aser NEAIFFSO secretary, Guolhoulie Rio natia jembia liasü.