AIIMS Delhi nung EAM, Sushma Swaraj tezüngjang melenogo

New Delhi, December 10(Agencies): India External Affairs Minister Sushma Swaraj Honibarnü All India Institute of Medical Sciences (AIIMS) New Delhi nung tezüngjang melenogo.
Osang ajanga ashiba agi, la temang nung tezüngjang melenba operation ji anepdang 8:30 ako nung tenzük aser nikongdang 2:30 nung tembang. AIIMS director MC Misra, Sub-Dean VK Bansal aser senior doctor kar densema iba surgery Cardio Thoracic Neurosciences centre of AIIMS nung takok ngua agiogo.
Iba surgery nung tongti shilem agirtemji Endocrinology nung tekolakba Nikhil Tandon, Pulmonary Medicine nung tekolakba Randeep Guleria, Cardio Thoracic nung tongti aser Nephrology nung tekolak, Sandeep Mahajan nunger liasü.
Swaraj’er jala-i tezüngjang ji tenlanüa liasü saka la dak diabetic tashidak aliba ajanga doctor temi ibaji magizük.
Doctor temi ashiba agi, nüngdakba mapang la dialysis agidar.
West Bengal Chief Minister Mamata Banerjee-i External Affairs Minister Sushma Swaraj yakta taneptsü angutsü imlar, ta shia liasü.
Swaraj ya ita ishika tejaklen nungi temang mejungi mozükilen aiben senzüa arur külen November 7 anogo AIIMS nung admit süa liasü.
Arishi küm 64 tain Swaraj ya mapang shia diabetes aser tezüngjang timtem aliba anepalua aru.
La nem tezüngjang tenlanür jenti liasü.