AIIMS nung nurse tem longkak ait

New Delhi, March 17 (Agencies): AIIMS nung tanü nurse 5,000-i longkak aitba sentong ka ayonga akaba sülen, operation agitsü aliba nisung 90 shi athi. Iba sentong ajanga emergency unit shibangadok aser shirangertem kanga timtem ajuru.
Iba longkak aitba sentong ajanga shirangertem aika tanga mozüki-i aotsüsa aküm. Nurse temi longkak aitba ya sensaker shirangertem kangshidaktsüba ajanga parnok ajangzüktsü nükjidong nung ketdangsertem den küptepa maparen ka ta AIIMS ketdangsüba menden ajanga metetdaktsü.
AIIMS nung nurse union-i ‘7th Central Pay Commission’-i latettsüba itasen dang nung tali kanga longkak aiter. Maneni itasen yanglushitsü asoshi akhangba aser allowances majungkettsüra, parnoki March 27 nungi tenzüka tanen makai longkak aitsü ta amokmeren. Iba dak sendakba nung AIIMS ketdangsertemi parnok takhangba Health Ministry nem agütsüogo, ta ashi.
Tanü ‘trauma centre’-i shiranger arur timbaka iba longkak aitba sentong ajanga temang manepaluteti AIIMS anasa aliba Safdarjung Hospital aser tanga mozükitemi yoktsüsa aküm.
Kishi nung tanükertemi ’emergency department’-i arur shirangertem aika meyipa yok aser telungi itetertem gondha aika doctor ataa mena liasü. AIIMS Emergency department nung anogoshia shiranger 2000 shi anepalur.
Patna nung alir küm 70 tain Raani Bai, shiba tezüng tashidak agi kangshir, lai ashiba agi, la Safdarjung Hospital-i meyok tsüngda doctor ataa gondha 3 shi mozüki nung liasü.
“Onoki mozüki nung shiranger anepalu yakta tenzüktsü ta bilema ataa liasü, saka kütsü temang tamajungba akümba ajanga Safdarjung Hospital-i yokadok,” ta Bai’er jabasoi ashi.
Linük tesem balala nungi shiranger arurtem aika longkak aitba sentong akaba memeteti arua timtem ajuru.
“AIIMS ketdangsüba menden ajanga 7th Pay Commission tetuyuba nung nurse tem itasen yanglushitsüogo. ‘Staff nurse’ nungi ‘nursing officer’-i nüngja melentsüba aser ‘study leave’ meshiba ken o agizükogo,” ta AIIMS nung ken atema Director menden bena alisang Dr Balram Airan-i ashi.