AIIMS tasen asem amenoktsü Centre sorkari agizükogo

New Delhi, October 07 (Agencies): Pradhan Mantri Swasthya Suraksha Yojna (PMSSY) mapatong kübok Maharashtra, Andhra Pradesh aser West Bengal state tem nung sen crore 4,949 jenjang AIIMS tasen asem amenoktsü atema benoka aliba Centre sorkari agizükogo, ta sorkar osang ka ajanga ashi.
Tanü Ato kilonser Narendra Modi lenisba nung Union Cabinet senden amenba mapang All India Institutes of Medical Sciences (AIIMS) tasen asem Nagpur (Maharashtra), Manglagiri (Andhra Pradesh) aser Kalyani (West Bengal) nung amenoktsü benoka aliba agizükogo.
AIIMS asemprong nungji yipten 960 asemba hospital ka alitsü. Iba den külemi teaching block ka, administrative block ka, AYUSH block ka, auditorium, nursing college, aonung mejangtsü atema block ka, hostel aser residential tesem alitsü.
Tanü Union Minister Piyush Goyal-i, “Linük asoshi tongtibang ta züngshia item tesemtem nung medical shisaliok tajung, nursing education aser nüburtem nem healthcare facility agütsütsü atema AIIMS tasen asem amenoktsü,” ta ashi.
AIIMS asem amenoktsü atema sen ajak agi crore 4949 intoktsü. Item rongnung Manglagiri nung AIIMS amenoktsü atema sen crore 1,618 crore, Nagpur nung crore 1,577 aser Kalyani nung AIIMS atema crore 1754 intoktsü.
“Item tesemtem nung AIIMS amenokba ajanga sen dalang agi healthcare service balala aika angutsü. Iba ya ajanga medical shisaliok tajung agütsüba den külemi item tesem nung health care nung inyaker mongintem agi anünga aliba tebilemtsü bentettsü,” ta Goyal-i ashi.
Iba project ya ajanga nütsüng kanga tali aliba Andhra Pradesh, Maharashtra (Vidarbha) aser West Bengal den külemi item temeket nung aliba state tem tajangzük angutsü.
PMSSY kübok AIIMS tasen trok tenzükogo aser Rae Bareily nung AIIMS teyangludak lir.