Aika anema raratsü atema Indian Army renema lir: Gen Rawat

New Delhi, June 08 (Agencies): Brihostibarnü Chief of Army Staff, General Bipin Rawat-i, linük temalen aser telunglen naprongla nungi amokmeren koktettsüsa Indian army kanga junga renema lir, ta metetdaktsü.
Osangbener den jembidang General Bipin Rawat-i, “Indian Army-i ana ser tesadang longjemba (China, Pakistan aser internal security) anema raratsü renema lir,” ta ashi.
Paisa, aika longjemba anema raratsüsa India renema lir, ajisüaka tensa tamajung nokdangtettsüsa linüki koka lir, ta ashi.
Iba dak sendakba nung pai, “Ato kilonseria yamai jembiogo, ‘tesüiba küm 40 tsüngda India-China arrtsü nung injang kata mekhadok,” ta ashi.
General Rawat-isa, tenemlen raratsü atema strike corps tasen, 17 Strike Corps atema maparen tenzükogo, ta metetdaktsü.
Paisa, “Iba (Strike Corps) ya tazüng nungi tenzüker. Iba atema sepai shimba maparen tenzükogo. Army sepai atema shimba sülen nungi training agiba aser tatemsa mapa lemzüktsüba tashi nung küm asem agir,” ta shisem.
Rawat-isa, sorkari onok nüngdaktem ajak meteta lir aser lenmang balala ajak nung onok nungita yaridar, ta metetdaktsü.
Indian Army renemshibaji linük kar temelung nung yur renemshir masü, ta paisa shisem.