Aikati südoksünema aliba otsü ka

– I. Temjen Jamir.

Chungliyimti lima alir rogo kanga alima tetenzüklen tambo Jongpongmar yongyai ao. Pai Tzülah o jen-ngi na tzü lenjem anasa yong bushia aru. Ajisüaka arem nungji ngoyatsü aser merila aika alibayong awaa tao majung liasü. Pai yakta miyong toka mi aputet aser süngküm taru-tajen nangoka mokozü longdaktsü. Iba mokozü jagi arem ajaka sunga oda anepongi tzüsü alonger ama liasü aser arem ajunga lemla-lemlaa aküm.
Kenpiga lir külen pai oagilen azü aser nisung ola angashi, saka ano olaji samaa ao. Meyimlai alidang Alisha (Ngüm) tulu kati tesülen nungji oba ni kümzükang ta aja. Pai kechiasü ta asüngdang nung Ngüm jagi nisung aser azü teloki ni tepsetsü arishir aser parnoki ni achitsü ta per jagi ashi.
Jongpongmar jagi sürabang na mimong atema nangdenba jana jagi yia atsükang, idangyongji per jagi mimong jagi ayi. Aser pa tepenla agima aidang nisung o azü na aji agi aru aser Ngüm indang asüngdang, saka Jongpongmar jagi yangibo malu, saka ayong külenji süngdong tongpen ajua alur amaibo angashiogo ta langzü.
Shi arishirtem jagi azü anir ayong leni alu. Abenjagi per to mimong nungi adok aser asüngdang, “Oba, oba, oba nai ni kümzük nung ni kanga pelar. Naia kü tebanglen aginer asü tepenlen aginer” ta asüngdang. Jongpongmar jagi khen bilemdanger tepenlaklen agüjang ta langzü. Alisha tulu jagi mozü jang amai tila ka agüja pai tepang nung anem. Ngüm jagi pa dang yamai ashi, oba nai tebanglen shim asübo tang iba mapang nung ni na meyoker lila, ajiser per tuluji pelaseta ao.
Saka ano ola tila agi pa den jembi aser olaji pa meketa nungi jembi tenzük. Ola jagi pa dang kodang pa chitem salaa chiyongtsü ta asüngddang, pai junga reprangdang nung aji Mejatemi jembir liasü aser aji pa ainketer asütsü tetenzüker liasü.
Jongpongmar jagi Mejatem dang asüngdang, nenoki kodaser kü indang chitem angur? Idangji Mejai parnoki meimchir süklem 20 tashi nungi angur ta langzü. Ano Mejai pei tenük kodanga mamor ta ashi, Mejai tambo Jongpongmar dang parnok yimsüsür lir nung yimsüsür ter ana aser tanungba ajak sarudoker ama ta rasaa ashi. Meimchir yimsüsüsba o Meja yimsüsüsba na kasa ta pai angatet.
Jongpongmr-i per tuluji lendong nung kümzükba ajanga per jagi pa nem ain agütsü aser iba ain jagi pa akümli tepiyong takar küma lirepbatsüka jangratema ali. Tsüngremer temoatsüji mapa tila ka ajanga tenzüker.