AIMAG nung Naga nunger melangteper trok-i shilem agitsü

Kohima, August 11 (TYO): September 17 nungi 27 tashi Central Asia kübok Ashgabat, Turkmenistan nung 5buba Asian Indoor & Martial Arts Games (AIMAG) 2017, traditional aser belt wrestling championship nung India tenüng nungi shilem agitsü asoshi Naga nunger melangteper parnok trok shimtetogo.
Hokulbarnü nikongdang NWA office chamber, AMK building, Kohima nung osangbener den jembidang, 5buba AIMAG nung linük 42 nungi shilem agitsü, ta NWA ketdangsertemi ashi.
International jenjang nung Naga nunger melangteper temi linük tenüng nung shilem agütsüba ya Naga nunger melangteper otsü nung tang mezüngbuba lir.
Naga nunger melangteper temi iba tournament nung National Traditional Wrestling Federation – India (NTWFI) tenüng nung shilem agitsü. Iba tournament nung traditional wrestling ya September 18 aser 19 nung agitsü aser belt wrestling championship ya September 20 nungi 24 tashi alitsü.
Nagaland nungi iba tetoktepba nung shilem agitsü asoshi shimteta alirtem ya Angami aser Chakhesang kin nungi lir aser parnok ya Yorüba yimtsüng nungi Vechita Khesoh, Tuophema nungi Keduovilie Zumu, Phek yimtsüng nungi Surhoneyi Soho, Phesama nungi Visevo Zashümo, Thenyizu nungi Venuzo Dawhuo aser Kohima yim nungi Menuosetuo Yiese nungertem lir.
Tang NWA champion bena alisang Vechita Khesoh ya 100 plus kg category nung tokteptsü, Chakhesang nunger Surhoneyi Soho aser Venuzo Dawhuo-na ya seret 94 aser 74 category nung tokteptsü, Tenaprong ya taoba mapang open Naga wrestling champion lir.
Taküm opne Naga wrestling championship nung runner-up aser Angami nunger melangteper Menuosetuo Yiese ya seret 96 indang telemsa nung melangteptsü aser taoba mapang NASA champion aser 2016 NWA tournament nung jenjang pezübuba ngutetsang Keduovilie Zumu ya seret 94 indang telemsa nung melangteptsü. Angami nunger melangteper tejen aser SASA champion anaben bena alisang, Visevo Zashümo ya seret 84 indang telemsa nung tokteptsü.
Parnok melangteper trok nungi timba NWA team nungi national traditional wrestling championship, taoba küm NTWFI-i Pune nung shilem agia Naga nunger melangteper 13 nungi parnok 11-i takok ngua liasü.
Item melangtepertem ya India nunger telok den September 13 nü New Delhi nungi apusotsü aser parnok den külemi NWA tir Neivikuolie Nicholas Khatsü, secretary Vekhozo aser tatong tir Mitwatei Haibwang nungertema aotsü.
Osangbener den jembidang, NWA nem 5buba AIMAG nung shilem agitsü asoshi NTWFI-i maongka agütsüba asoshi pelar, ta NWA tir-i ashi.
Olympic Council of Asia (OCA) kübok 5buba AIMAG nung United World Wrestling (UWW) ajanga belt wrestling aser traditional wrestling ya inokogo, ta Khatsü-i ashi. NTWFI ya UWW indang associate member ka lir aser International Olympic Committee (IOC) ajanga recognize süa lir.