Ain nung inyakertem

Tsüngrem yimliji o jembiba nung masü saka ain nung lir ta 1 Korint 4:20 nung  shia lir. Iba Lai tekong nung shia aliba Tsüngrem o ya tanü tensa asenok dak kanga petpeter ta bilemer. Asenok ajaki Tsüngrem temeim indang jembir saka jembiba ama asenoki melitetter. Asenok aikati Tsüngrem mapa inyaker aser kanga junga sayutsüngir saka Tsüngrem ain adenba tamaitsü kecha mangur. Aji oda, Khristan taküm ya mapa tulu inyaktsü bilemba dang masü mesüra mezümeküma aliba purtema masü saka Khristan takümji Tsüngrem tashi aser ain nung alir. Tenyar Paul Tsüngrem tanüla temeshi agi sünger ain nung sayutsüngia jajaba mapang, Korint nung alirtem kari pa sayutsüngiba aitsü aser parnoki sayutsüngibaji dang shitak ta amangba purtem mesüzüktsü kanga meranga jajaa liasü. Ajisüaka, Paul sayutsüngia jajaba den pa anemertemi sayutsüngibaji medemdangra kenyongi tepila talangka liasü. Paul-i ain nung sayutsüngi saka pa anemertem dak tanüla temeshi ain maliasü. Ibayongji, Paul-isa Korint 10:10 nung pa anemertemi pa indang majung jembitsüba ajanga amangba purtem memetsüdaktsü aser mashileni maotsü atema tekümdangtsü o kar ashidang, karibo pai shidi tajung aser sashisashia züluaka, pa dak tashimait aika lir aser pai takitsü o mejembir ta jembitsür, ajisüaka Tsüngrem yimliji o kija junga jembiba agi masü saka ain agi inyakba ajanga dang angatetter ta shia angutsü. Tenyar Paul ajanga nisung aika temulung meyipa Yisu dak amangdaktsü aser arogo tenzükyong ao. Pai shiranger jungtsü aser tasür a shia arudaktsü. Pa anemertemi ashi ama, Tenyar Paul-ji o jembiba nung tsüngro masong asütsüa akok saka pai jembiba otem nungji Tsüngrem ain aser tashi dena liasü. Atangji, Tenyar Paul mapang Korint nung sayutsüngia jajar amaji, tanüa Tsüngrem yimli indang sayutsüngia jajar asenoki aika ajurutsüa akok. Parnok jagi o kanga junga jembitsü akok. Parnok jagi asenok dang alima tesem balala nung atalokba indang tejangja bener arua ashitsüa akok. Ajisüaka, tagitsübajibo parnoki jembiba nungji Tsüngrem ain dena ali asü mali aser parnok taküm nung tanüla temeshi tashi ali asü mali ta asübaji asütsü. Nisung karibo Laishiba nung aliba o kanga junga jembitsüa akok saka pai jembiba ama pa taküm melitetra, pai jembiba oji ain maketba o aser pa takümji tazüngla taküm asütsü. Nisung kari Tsüngrem ain aser tashi indang jembitsüa akok saka pa taküm nung Tsüngrem ain aser tashi agi akokba kuli melira, pa oji takidak makaba o akümtsü. Takokba Khristan taküm ka alitsü asoshi jembitsübo kanga temela saka mapa agi inyaka sayutsübo kanga tasak lir. Asenok rongnunga 2 Timoti 3:5 nung shia aliba ama, ” temeshiba mesüka benshir saka iba tashi ainbo mali,” ta lia lira, Tsüngrem tsüngdang asenok temenen nangzüktsüla aser tanüla temeshi agi süngjang ta ashitsüla. Idangji dang asenok taküm nung Tsüngrem ain aser tashi adentsü.