Ainkar Mohammed anema jembiba atema Hindu nunger ka tepset

Tangail (Bangladesh), April 30 (Agencies): Muslim nunger timba ser aliba linük Bangladesh nung Honibarnü nisung anati Hindu nunger sü arür ka tepsetogo.
“Pa lenmang tezülen mena lia parnok motorcycle ka nung arur pa dak tekolak, tekong aser teka nung techira oset agi yirutsü,” ta Tangail district police deputy Chief, Aslam Khan-i ashi.
Pai ashiba agi, asürji arishi küm 50 Nikhil Chandra Joarder liasü, aser küm aika tejaklen pai Prophet Mohammed anema jembiba atema tepset südi.
Nikhil tepsetbaji minority tem jenti tepsetertem, Islam telungpurtemi asü kibong dak sentakba mangatettep ajanga’ar iba kuli bushisüngdangdar, ta police ketdangsertemi ashi.
Parnokisa ashiba agi, sü arürba dokan lapoka alisang jagi Prophet Mohammed anema jembiba atema 2012 küm Muslim nunger kari police tsüngdang ken o benoka liasü.
“Ajisüaka iba mangatettepji tatem nungbo junga tembangogo. Par kibongi, paji kinünger kati amokmerener ta shiogo,” ta police ketdangser kati ashi.
Tawatanü Bangladesh nung bendangertem, Sufi, Ahmadi, Shiite aser Khristan tem jenti tepsetba atema kiralongrar telok-IS-i tenüng agiogo.
Nütsüng million 160 aliba linük, Bangladesh nung Hindu nunger nüngtsüng shilem 10 shi dang lir.