Air Ambulance ka Delhi tayimtsü anenba anasa tsükokpeta anen

New Delhi, May 24 (Agencies) : Patna nungi aruba Air ambulance ka engine anaprongla mapa meinyak akümba ajanga Delhi tayimtsü anenba tesem anasa tsükokpeta lua anenba mapang nisung tenet mena aliba rongnungi nisung ana yiru.

C-90 Beechking ya Trinamool party nungi Rajya Sabha MP, KD Singh meyong Alchemist Group indang tayimtsü lir aser tanü Delhi anülulentip tsütsü Najafgarh tesem nung tsükokpeta anenba sülen lendong tulu mataloki lir.

Iba tayimtsü nung tayimtsü anirtem den doctor ka, temulungjang tashidak agi shiranger nisung ka aser technician ka ta liasü. Temulungjang tashidak agi shirangsang ya Patna nungi Delhi mozü kidangi anir aruba mapang iba lendong atalok.

Delhi tayimtsü anenba tesem atongtsü tatsüka dang lia tayimtsü engine anaprong ka sülen ka ta mapa meinyaki akümba ajanga tayimtsü anisangi iba tayimtsü rongdang anentsü lemteta anenba ajanga lendong tulu ka ataloktsü aliba nungi jenbo.

Tayimtsü ali nung lua anenli tayimtsü anisangi phone ajanga Air Traffic Control aja.

Shiranga anir arusangji iba tesem nungi Medanta Medicity mozü kidangi indang indanga anir ao.