Air hostess ka den tashiyim agi noksa agitsü meranger tebur ka apu

Mumbai, June 27 (Agencies) : Hombarnü Gujarat nunger kati Jet Airways nung inyaker air hostess ka dak tim masüba yimya benshia lai memulungi selfie agiba atema pua lir.
Arishi küm 29 tain, Mohammed Abubakar-i iba mapa tamajung inyakba dang masü saka ano metsümeshiba tesem nung moko chia aircraft temzüng alema benshi.
Pa mena aliba, Damam nungi Mumbai aoba tayimtsü Chhatrapati Shivaji International Airport (CSIA) nung anenba sülen pa apu.
Iba tatalokba ya Damam nungi tayimtsü apusoli nungi atalok.
“Ni tayimtsü nung jaja oa alidang Abubakar-i kü teka nung soit aser selfie ka agidi, (Chalo na yaar, ek selfie lethe hai) ta ashi. Ni mah ta shidakmonga pai tayimtsü jaja piyong maneni kü dak yimya masüba benshi,” ta iba air hostess-i benokba case nung zülua lir.
“Ni kü sülen nisung ka anidaker amai angashi anungji meyipa reprangdang nung Abubakar kü sülen nokdaka liasü. Pai kü dang selfie ka agidi ta asüngdang saka ni mah ta ashi aser ni kü menden nung oa amen nung pa kü sülen arua nokdaktsü tenzük anungji ni nokdaker ao nung pai kü dak tapubang nung soiter tashiyim agi selfie tangok. Anungji ni ola tashii adok aser kü ola angashia cabin crew member pezü küna aliba tesem tonga aru. Parnok aruba ngua Abubakar metsümeshiba tesemi ai. Pa yangji moko chia kazür adok,” ta kasa shidi nung lai zülua lir.
“Crew temi pa nem ozüng agütsü aser pai sema aliba moko pongdang aser lighter na meshi,” ta sub-inspector VS Pawar-i ashi.
Pai kodaser security-i mitba nungi jenbua mi adokba oset bener tayimtsü telungi aiar ibaji tang bushidangdar. Tayimtsü tejajadak nung moko achiba ajanga nisung aika lendongi idaktsür. Pa meyong mobile phone-a pua lir aser forensic sciences laboratory (FSL) nung reprangdangtsü, ta paisa ashi.
Abubakar ya Indian Penal Code, sections 354 (outraging modesty of women), aser 336 (act endangering life or personal safety of others), aser Aircraft Rules section 25 (safety violations) kübok pua lir.
Ni Damam, Saudi Arabia nung hotel ka nung inyaker aser ni iba selfie ji pelateptsü atema agiba dang lir. Ni Mumbai tonger Gujarat-i aotsüba liasü, ta Abubakar-i ashi.