Air India nung Chairman tasen shimogo

New Delhi, August 20 (Agencies): Brihotibar nü centre-i Air India nung managing director aser mendenbuba asütsü asoshi “Indian Railway Service of Mechanical Engineers” (IRSME) nungi Ashwani Lohani shimogo.

Iba telemtetba ya Ato Kilonser Narendra Modi mendenbuba ser “Appointments Committee of the Cabinet” (ACC) senden ka akadang agia liasü.

“Wb. Lohani nem iba mapa nungloktsüba jangjaogo. Iba dak sentakba department aser Air India danga iba osang metetdaktsüogo,” ta Civil Aviation ministry nung ketdangsertemi New Delhi nung IANS osangbenertem dang ashi.

ACC-i 1980 küm IRSME nung officer asütsü mezüng ajemoksang, Lohani nem Air India nung managing director aser mendenbuba asütsü asoshi shimtetba osang agütsüogo, ta Department of Personnel & Training (DoPT)-i sangdong ka ajanga metetdaktsüogo.

Tang ya pa Madhya Pradesh sorkar nunga teinyakdak lir. Tang Air India rongsen ketsüng nung asüngsashitsü mapang tepetep ka nung Lohani iba mapa asoshi shimokogo.

Tesüiba mapang khen atema iba mapa benloka alisang Rohit Nandan melena Lohani ya shimerba lir.

Nandan aliba mapang Air India-a Star Alliance rongnung aden. Nandan iba mapa nungi August 21 nü anentsü.