Air India tongti, Ashwani Lohani Railway Board Chairman shim

New Delhi, August 23 (Agencies): Bodhbarnü Air India mendenbuba, Ashwani Lohani Railway Board nung mendenbuba shimogo.
Tawa train lendong aika atalokba nung ajemdaker AK Mittal-i railway board chairman menden toktsüba sülen tanü Lohani iba menden atema shimmer.
Lohani ya Madhya Pradesh Tourism Development Corporation nung inyaka liasü, aser küm ana tejaklen pa Air India nung tongti shim. Pa lenisüba nung Air India nung terenlok kanga kaogo.
1980 batch Indian Railway Service of Mechanical Engineers officer, Lohani-i tongtibang shilem agiba ajanga Delhi aser Alwar tsüngda Fairy Queen senzütettsüsa alima nung tejentiba steam locomotive shia arudaktsü.
1979 küm Lohani arishi küm 19 dang asüdangyongi pai Engineering degree pezü tashi anguba atema Limca Book of Records’ 2007 edition nung pa tenünga züngoka liasü. 1998 küm nunga Fairy Quuen atema pai Guinness record angu.
Pa lenisüba kübok meranga inyakba ajanga world heritage sites nung Darjeeling Himalayan Railway aser Bodhgaya’s Mahabodhi Temple na züngoka liasü.
Pai kaket ana zülua lir, aser ibaji “Smoking Beauties” aser “Winning at Work against all odds” kakettem lir.