Air strikes atema IAF dak alaka shingaia tenüng magitsüla: Sena

New Delhi, February 28 (Agencies): Maharashtra aser Centre naprongla nung BJP den teloktep party- Shiv Sena tongti, Uddhav Thackeray-i, Pakistan Indian Air Force (IAF)-i Jaish-e-Mohammad indang training camp amakba atema IAF dak alaka yimtenren party shinga-ia tenüng tajung magitsüla, ta ashi.
Mumbai nung osangbenertem den jembidang Thackeray-i, “Pakistan nung kiralongrartem jenokba tesemtem amakba atema nüma tangtetba agi kü melungjang awaker. Iba operation aoer tasütait sepaitem nem ni akhüm agutsür. “(Defence forces dak alaka) Shingaia parnok (IAF pilots) tasütait mapa atema tenüng tajung magitsüla aser shingaia iba nungji ratamata malitsüla,” ta pai ashi.
Taoba hopta BJP den election jakdang BJP den loktepsang Thackeray-isa, pai BJP danga Shiv Sena-i sensakertem tebilemtsü onüktem atema raratsü ta shiogo, ta metetdaktsü.
Taoba mapang Karnataka chief minister aser tang state BJP Tir, BS Yeddyurappa-i, India-i Pakistan nung JeM camp amakba ajanga taruba Lok Sabha election nung BJP-i Karnataka nung tajemba agia menden 22 nung takok angutsü, ta jembiba sülen aikati iba o aitsüba mapang ka nung Shiv Sena leniri party shingaia tenüng tajung magitsü atema jembiogo.
Iba dak sendakba nung Yeddyurappa aija külem BJP lenir aser Union Minister VK Singh-i, “BSY BJP, kü tangatetbabo balaka. Asenok linük ka ama longjemer, asen sorkari inyakbaji linük aser sensotem kümzüktsü atema lir, menden tali nung takok angutsü atema masü,” ta aitsü.
Ano Karnataka Chief Minister, HD Kumaraswamy-ia, “Kiralongra anema raraba nung nung linük nübur ajaki longjemer Centre sorkar aser asen sepaitem nungitba mapang ka nung BJP lenir Yeddyurappa bo kiralongra aser Pakistan den rara ajanga Lok Sabha menden tali kwi angutsü, ta ongko ang inyaker,” ta aitsü.