Airtel-i Arunachal nung 4G tenzüktsüogo

Itanagar, September 19 (Agencies): Alima nung mobile service agütsür rongnung temaba jenjang asembuba nung aliba company aser Asia o Africa na lokteper linük 20 tashi nung service agütsür, Bharti Airtel Limited-i Honibar nü Arunachal Pradesh (AP) nung LTE ta ajaba ‘high speed 4G service’ tenzüktsüba metetdaktsüogo.
Onoki inyakba ajak service amshirtem dak rangloker inyaker aser parnok anisüngzükdaktsütsüji onok nükjidong lir. Linük nung Mobile data traffic kanga aika akümba ajanga tamshirtemi 2G nungi 3G aser tang ajak dang tekaraba 4G melena amshiteper, ta Bharti Airtel CEO, (Assam & NE) Saurabh Goel-i ashi.
State nung data tekara aginüba ajanga onoki Itanagar nung Honibar nü 4G service lapoktsüogo. Tang nungibo Airtel amshirtemi phone aser computer balala nungi 4G amshitettsü, ta paisa ashi.
Linük nung 4G ya mezüng Airtel-i benok aser 2012 April ita nung Kolkata nung mezüng amenoka liasü. Linük nung yimti aser jila 296 nung 4G tenzüktsüogo, ta Airtel-i taküm August 6 nü metetdakja liasü.
Parnoki 4G ya ajaki amshitettsüsa melapoktsü tsüngda tamasa teshimtet yimti kar nung tendangba mapang tamshirtem nungi service tali tashi itshitsü asoshi tetuyuba balala agüja liasü, ta Airtel sangdong ka ajanga metetdaktsü.