Airtel-i postpaid subscriber tem nem data angati agütsür

New Delhi, April 16 (Agencies): Reliance Jio den tokteptsü asoshi Mobile operator Bharti Airtel-i parnok indang postpaid subscriber tem nem high-speed data angati agütsüdar.
April 30 nü tashi nung ‘My Airtel’ app-i login asüba sülen nungi post paid subscriber tem nem angati data GB 30 tashi agütsütsü.
Subscriber shirnok taoba ita tang agütsüba offer mesükba data GB 10 angati agi angutsüba nung züngsema lir, parnoka iba offer tasenba nunga züngsemtettsü, ta compang otongdar ajanga metetdaktsü.
Iba den bendenloka Airtel-i ashiba agi, customer tem shirnok ‘international roaming pack’ shidak inoka mali, parnok asoshia offer agütsütsü.
Tatishitsü agi, Airtel subscriber ka ainlen senzüdang amshitsü asoshi pack shidak meinoki senzüa alidang parnoki anogoshia amshiba nung sen 499 dak tali amshira Airtel-i taa kecha magi-i sen 499 pack idangjisa activate sütsütsü. Iba pack nung unlimited incoming calls, free data, SMS densema lir.
Iba osang ‘mail’ ajanga Airtel-i postpaid customer tem nem metetdaktsüdar.
Taoba ita isheka tsüngda nung Reliance Jio-i offer balala agütsüba ajanga shishilembadak tanga company temia parnok customer tem mesamadaktsütsü asoshi sentongtem renema customer billion 1.12 dak tali nem offer balala agütsüdar.
Jio-i yaküm angati o jembitsüba aser data agütsüba sülen parnok nem taa agüja Jio network amshir subscriber million 72 jungogo.
India ya China sülen alima nung telecom shishilembadak tulutiba rongnung tanabuba lir. Indian telecom market asadangertemi ngutetba agi, taruba ita tem nunga iba tetoktepba kanga sashia alitsü.