New Delhi, August 29 (Agencies) : Reliance Jio den tajungba asütsü aser parnok business ajanga makoksatsü atema telecom tongti Bharti Airtel-i 4G aser 3G mobile internet jenjang noklang nung shilem 80 tashi ajemogo. Iba special scheme ajanga gigabyte (GB) ka nung sen 51 tashi alua tamshirtem ajangzüktsü.
Iba tajangzük agitsü atema Airtel customer temi mezüng sen 1,498 agi recharge asütsütsüla. Iba sen jagi 4G mesüra 3G mobile internet data 1GB anogo 28 atema angütsü, ta Airtel sangdong ka ajanga metetdaktsü.
Iba 1GB data limit atemba sülen customer-i ita 12 tashi 4G mesüra 3G indang 1GB data sen 51 agi recharge süa amshitettsü. Ita 12 tsüngda nungji sen 51 recharge ji mezüngdangtetben sütettsü.
Tang ya Airtel-i 3G mesüra 4G indang 1GB mobile internet sen 259 agia ayoker aser ibaji anogo 28 atema lir.
Parnokisa ibai mesükba scheme ka sen tera dalangba, sen 748 indanga sayaogo. Iba scheme ajanga customer temi 4G indang 1GB data ita 6 atema sen 99 agi recharge süa amshitettsü.
“Item pre-paid offer tem ya Delhi nungbo amshitsü tenzükogo aser August 31, 2016 tashi nung telungtet tesemtem nunga sayatsü,” ta sangdong nung shia lir.
“Item scheme tem ajanga onok customer temi taoba mapang internet alia amshiba jenjang agi tan GB timba alia amshiteta parnok ajangzüktsü,” ta Bharti Airtel Director – Operations (India & South Asia) , Ajai Puri-i ashi.
Airtel-i July ita 4G aser 3G scheme jenjang noklang nung shilem 67 tashi ajemba sülen Idea Cellular aser Vodafone naprong jenjang alu.
Ano August ita Airtel-i sen 1,199 indang plan ka ajanga 3G mesüra 4G data atema 1GB agütsütsü aser roaming mapang voice calling angadi amshitsü offer agütsü.
Reliance Jio marudang yongi Airtel aser Idea company temi mobile data jenjang nung temelenshi adokdaktsür liasü.
Reliance Jio-i tang 4G service sayatsü renemdar aser parnoki ‘Jio LYF Preview Offer’ kübok LYF devices amshirtem ajak nem iba offer angadi tendanga amshidaktsür.
You must be logged in to post a comment Login