‘Airwaves auction’ atema telecom company 7 temsüa lir

New Delhi, September 24 (Agencies) : October 1, 2016 nungi tenzüktsü aliba ‘airwaves auction’ nung bid süteptsü atema telecom company 7 temsüa lir, ta Department of Telecommunications-i sangdongogo.
Iba auction atema temsüa alirtemji Bharti Airtel, Vodafone India, Reliance Jio Infocomm, Reliance Communications, Idea Cellular, Aircel aser Tata Teleservices tem lir.
Reliance Jio-i linük nung aliba licensed service area (LSA) mashi ka atema bid sütettsü aser Reliance Communications-i northeast aser Assam dak alaka linük rangben nung bid sütettsü. Jio-i Earnest Money Deposit timba, sen crore 6,500, süa lir aser point 44,506 nguteta lir.
Tang tayoktsü aliba Spectrum ajak senteper 2,354.55 MHz lir aser aji sen lakh crore 5.66 alang asütsü. Telecom operator tem atema 2,354.55 MHz indang airwave ya band tenet–700 MHz, 800 MHz, 900 MHz, 1,800 MHz, 2,100 MHz, 2,300 MHz and 2,500 MHz-nung lir aser iba ya ajanga sorkar nem sen billion dollar 17 ajangzüktsütsü.
Operator tem nem iba atema sen ajak installment nung mesüra khen nung ajak agütsütettsü maongka lapoktsütsü. Company kobai 1 GHz bandwidth teküpok airwaves alitsü adokdir parnoki noklang nung shilem 25 indangjisa agütsütsüsa akümtsü aser iba dak timba alitsü adokertem dang nungi shilem 50 indangjisa meshitsü.
Sen khen nung agüja alirtem nem iba spectrum ya anogo 30 tsüngda nung bendanga magütsütsü. Sen menua magütsürtem dang nungi yaküm ama tetemlok noklang nung shilem 10 masü saka tajemba kümer noklang nung shilem 9.3 ang agitsü, ta sorkari lemtetogo.
Item temelenshi ya taküm June ita nung Ato kilonser Narendra Modi mendenbuba sür cabinet senden amenba mapang lemtetbatem lir.