Aishwarya Rai Bachchan talangka lir ‘ramp’ nung jaja

New Delhi, August 03 (Agencies): Aishwarya Rai Bachchan-i shilem agitsüasoshi mapang talangka yongya aliba sülen Sanjay Gupta meyong Jazbaa film nung shilem agitsü sentong lir, ajisüaka Bollywood actress-i ashiba agi, kechi yamai yongyateptsü ali, kechiba süra ni küm pongu Bollywood nung shilem magiaka nibo Bollywood nungi kodanga pila lir ama mebilem.

Deobar nü Delhi nung fashion show sentong ka akadang la ramp nung talangka sülen jajaba ajanga nisüng ajak kanga jangaratemdakja liasü.

Arishi küm 41 tain, Aishwarya-i tang tashi nung tatemsa shilem agia aliba film ji Sanjay Leela Bhansali meyong Guzaarish film nung 2010 küm shilem agiba lir.

Lai, Jazbaa film atema la camera jakdang tanaben nokdaka mapa inyaktsü jangratema bilemer, ta ashi. Iba film nung Shabana Azmi, Irrfan, Chandan Roy Sanyal aser Jackie Shroff nungeria shilem agitsü.

“Tang tashi nung ni ajangshia aruba ajak ya kanga jangratemtsü ka lir—film nung Irrfan, Shabanaji, Chandan, Jaggu Dada (Jackie)—parnok ajak kanga junger. Ni parnok den külemi inyakshiba atema kanga pelar. Shingaia shinga senzüka metoktsür. Ni kanga jangra atemer,” ta Aishwarya-i ashi.

Iba film ya October ita nung sayatsü sentong lir aser iba ya 2007 küm South Korean movie “Seven Days” yanglushiba film ka lir.

Aishwarya ya Deobar nü Delhi nung designer Manish Malhotra-i ayongba sentong ‘The Empress Story’ nung mapang talangka sülen ramp nung jajaogo.

Temang manemi liaka tesüiba mapang model, Aishwarya-i chocolate brown sentsü tola ka alitonga atsüshishia semer ramp nung jajabaji tereprangnütsü ka liasü.

Iba sentong nung tenü Jaya Bachchan den Bollywood nungi Azmi, Aditi Rao Hydari, aser Kriti Sanon nungera dena liasü.

“Delhi nung shilem agiba mapang nüburtemi, Bollywood nung külemi inyakertemi aser onüla nunger ajaki pela agizükba ya kanga jangratemtsü ka lir,” ta lai ashi.