AIUDF ji BJP tsükchir tongtiba : Himanta Biswa Sarma

Silchar, March 6 (Agencies) : BJP atema tsükchir tulutibaji AIUDF aser parnok tir Badaruddin Ajmal lir ta BJP lennir Himanta Biswa Sarma-i metetdaktsü.
Silchar nung aliba BJP district committee office nung osangbener den jembidang, taoba Assam minister Himanta-i ashiba agi, taruba assembly elections nung BJP-i AIUDF aser Congress den raratsü.
Yimtenren raraji Congress den asütsü saka BJP-i Ajmal anema takok angutsü merangtsü. Pa ya India aser Assam atema tsükchir tulutiba lir. Ajmal madak takok mongura, künü anogo pai linük ajunga samatsütsü, ta Himanta-isa metetdaktsü.
Assam nung Congress atema tarutsü mali, ta Himanta-isa shisem.
Assam nung April 4 aser 11 nung assembly elections agitsü aser iba nung takok angutsü mcehi nung parnoki Congress aser AIUDF na toktsür tanüngba telok ajak den tesentaktep yanglur, ta paisa ashi.
March 15 tashi nung BJP-i taruba assembly elections atema candidate tem tenüng metetdaktsütsü, ta Himanta-isa ashi.
Paisa, AICC tatong tir Rahul Gandhi ji college student ka ama dang lir aser pa dak shisatsü mali aser yimten mapa memetet, ta ashi.
Hokolbarnü Rahul Gandhi-i Silchar semdangdang Assam chief minister Tarun Gogoi-i Barak Valley nem sen crore 3,000 agütsütsü ta nangzükba olen Himanta-isa aitsü.
“Iba tenangzükba jagi Barak Valley nung alirtem mekülakoktsütettsü” ta pai ashi.
2011 nunga Gogoi-i Barak Valley nem sen crore 1,000 agütsütsü nangzük saka mapa küma meinyaktet. Barak Valley nung gari lenmang tia angudang sen arua mapa inyakba kecha mangur, ta Himanta-isa metetdaktsü.