Aizawl FC-i Fed Cup nung 2-1 agi Bengaluru FC madak takok angu

Aizawl, April 30 (Agencies) : Honibarnü Rajiv Gandhi Stadium, Aizwal nung Federation Cup mezüng asaya nung Aizawl FC-i I-League champions tasenba Bengaluru FC telok madak 2-1 agi takok nguogo.
Iba asaya tenzüker minute 15buba nung Eugeneson Lyngdoh-i Aizwal FC atema mezüng goal yok ajisüaka minute 38buba nung Bengaluru FC nungi Alfred Kemah-i tetsüng abelen agi metsüba ball ka goal aiba ajanga mezüng goal azüdoka asaya mezüng tesadang tashi nung telok ana tsüngda 1-1 aküm.
Asaya tesadang sülen joko asaya tatemtsü mapang minute 90buba nung Joel Sunday-i Aizwal FC atema goal ka yoksemba ajanga tanü asaya nung parnoki 2-1 agi takok angu.
Iba tamakok anguba sülen joko Bengaluru FC May 3 nü tenzüktsü aliba tanabuba league asaya nung kanga meranga asayatsü nüngdaka kümogo.
Lyngdoh-i mezüng yokba goal ji talang nung metsüoktsüba ball ka liasü.
Bengaluru FC coach Ashley Westwood-i, tanü asaya nung onoki goal pezü tashi yoktettsüsa maongka nguogo ajisüaka tia makai item maongka magitet. Taruba league nung onoki tanü dang nungi tajungba asayatsü, ta ashi.
Aizawl coach Jahar Das-i, onoki tanü asaya takoktsü tim nung akok, ta ashi.
“Onoki junga asayaba ajanga tanü iba takok angu. Taruba league nung ano onoki tajungtiba nung asayatsü tebilemba lir,” ta paisa ashi.