Aizawl nung NEZCC programme committee senden amen

Kohima, Rongchii (April) 09 (TYO): 2018-19 küm atema North East Zone Cultural Centre (NEZCC) Programme Committee senden Aijal Club, Aizwal, Mizoram nung Rongchii (April) 9, 2018 nü menogo aser senden nung adenertem rongnung Nagaland Angh aser Chairman, NEZCC, PB Acharya aser Mizoram Angh, Lt. Gen (Retd) Nirbhay Sharma nata densema liasü, ta PRO to Govenor sangdong ka ajanga metetdaktsü.
Onük jembidang Nagaland Angh, PB Acharya-i, NEZCC nükjidongji Northeast region nung aliba sobaliba sayatsü, ajungkettsütsü aser wazüka ayutsü atema dang masü saka cultural exchange den programmes ajanga linük ajungkettsür aser tashi itdaktsür, ta metetdaktsü.
Paisa, NEZCC tenzükba mapang nungi NEZCC-i Northeast nung aliba state ti sobaliba aser arts wazüka ayuba den ajungkettsür, ta ashi.
Paisa züngsem state ajak dang NEZCC mapatong balala nung yaritepa inyaktsü ajungshia liasü. PB Acharya-i, “Asenoki asen sobaliba takar aser oshiopen maneni wazüka ayutsüla aser ajungkettsütsüla, kechiyong ibaji asen maitsü lir, aser itemji ajanga asenokji shibar’ar jangjar,” ta ashi.
Kasa senden nung Mizoram Angh, Lt. Gen (Retd) Nirbhay Sharma aser Mizoram Minister for Art & Culture, R Romawia natia jembia liasü.
Iba senden ya Secretary, Art & Culture, Govt. of Nagaland, Shola Those, IAS leniba nung agi aser Director NEZCC, Jitul Sonowal-i lokti pelaa agizükba o jembia liasü.