Aizawl nung tebur 4 rongnung 1 dak cancer adoker

Aizawl, October 3 (Agencies) : Linük nung tanga yimti nung alirtem dang nungi Mizoram yimtiba Aizawl nung alir teburtem dak cancer temelaba adoker.
Population Based Cancer Registries (PBCR) ajanga ashiba agi, India nung arishi küm 74 tashi nung cancer adokba yimtitem asadangba nung Aizawl nung tebur pezü rongnung ka dak atonger ta bushitet. India nung tanga tongtipang yimtitem nung tebur 7-8 rongnung 1 dak dang cancer adoker ta bushitet.
“Ano, Aizawl nungsa tetsür pungu nungi ka dak cancer adoker. Ajisüaka, Mumbai nungbo tetsür 8 rongnung 1 dak aser Delhi nung tenet rongnung 1 ka dak adokba bushitet” ta Mizoram Nodal Officer of Cancer & Principal investigator for PBCR, Eric Zomawia-i osangbener dang metetdaktsü.
India nung moko timtiba achiba state ji Mizoram lir aser iba state nung cancer adokbaji moko achiba ajanga lir ta PBCR-isa bushitetba osang metetdaktsü.
Mizoram nung nütsüng yongsükji lakh 11 shi lir aser kümshia cancer agi nisung 725 shi taküm samar ta PBCR-isa bushitet.
2012 aser 2014 tsüngda Mizoram nung cancer agi shiranger 4,656 putet aser parnok rongnung tetsür 2,089 densema liasü. Iba osang ajanga küm shia Mizoram nung nisung 1,552 shi cancer agi shirangba puteter.
Linük nung PBCR ajak agi 29 lir aser 11 bo northeast kübok state 8 nung lir.