Aizawl, January 13 (Agencies) : Mizoram nung yi ayokdak lapoktsü temelaba agütsüba sülen nisung telok kati Aizawl kübok Bawngkawn kiyong nung yi ayokba dokan tasen ka raksatsü aser parnoki National Highway 54 nung yi bottle ajak raksa endok, ta police-i metetdaktsü.
Parnoki nisung telokji azüoktsü merang saka nisung onsara asüba agi mazüoktet ta police-isa ashi.
Bawngkawn kiyong nung lennirtemi parnok temeket nung yi ayokba dokan lapoktsüba memulungi liasü aser parnoki dokan kibur dang mepishiaka pai parnok tashi mangai dokanji lapok.
Iba jagi yashi nisung telok ka adenshir yi ayokba dokan raksatsü aser idakji aliba yi bottle tem raksa endoktsü.
Mizoram nung yi ayokba dokantem lapokba anema nübortemi ola adokyonga arur, saka teka ia inyakba mapaji tan ya mezüng ataloker asütsü.
January 15, 2015 nungi state sorkari Mizoram Liquor Total Prohibition Act, 1995 melena Mizoram Liquor Prohibition and Control Act, 2014 yanglushiba mapa küma inyaktsü tenzük.
February 20, 1997 nungi Mizoram nung yi mayoktsü ozüng agüja amshiyonga aru, saka arogoi memulungaka January 15, 2015 nungi Mizoram Liquor Prohibition and Control Act, 2014 ozüng tasen amshitsü tenzüka liasü. Iba ozüng amshitsü tenzükba sülen ita shi shi lir külen Mizoram nung mezüngbuba yi ayokba dokan lapok.
You must be logged in to post a comment Login