Ajak den sakuku süa litetba party-ji Congress dang lir: Alem Jongshi

Ungma, March 23 (TYO): 26 Aonglenden Assembly Constituency bye election nung Indian National Congress ticket nungi tokteptsü alisang Alem Jongshi election-i aiba sangoktsüba sentong ka March 23 nü Ungma Langpanglenden nung kaogo.
Tanü iba sentong nung Pradesh Congress Committee Nagaland Vice President Jonathan-i anir Mokokchung DCC President Watimongba Aier, Mokokchung DCC General Secretary Aojungshi, PCC member (26 Aonglenden A/C) Lanusanen, Mokokchung DYC President Rongsenshilu, 26 Aonglenden AC Mahila President Ngangshimongla, Ungma Village Council Chairman Alemtoshi Imsong parnoki tongti shilem agia jembi. Sentong nung Congress veteran-tem den ano Congress meimertem aika arua aden.
Candidate Alem Jongshi-i iba sentong nung shilem agidang, Aor nem Chief Minister pezüben tashi agütsüba Congress party-ji mesüdaktsütsü atema pa election nung noktaker, ta ashi.
Congress party-ji yimjung meimba party ka lir, Congress party nung azüngtokshiba mali, anungji, mepetmesü kecha melii yimjung aser tesünep nung iba election tembangdaktsütsüsa ajaki pei mulungba party aser lenir nem vote agütsütsü asoshi paisa ayongzüka liasü.
Lokti tentet telemsa mali arok ajungtsü atema inyakba aser nübur den terayanga itetbaji pa atema politics lir aser pai iba nungji amanger, ta ashi.
Tanü India ajungalen Congress asentenshiba angur, aser Nagaland nunga memenui asentenshitsü, aji oda, asenok dang lungjemerbo Congress Party-ji taoba mapang ama takok angutsü lenmang lir, ta paisa teimla o ka ashi.
Naga nungeri BJP party ya majung ta jembir saka parnok den tembar ayimer. BJP ya lokti ka ajungtsü atema nükjidong yur inyakba party ka lir, anungji, BJP-ji talisa Christian pur aser asenok ama minority-tem atemabo mapet aser majung, ta pai ashi. “Ajak den sakuku süa litetba party-ji Congress party dang lir”, ta paisa shisem.
Paisa pa nem maongka agüja shimra pai inyaktsü atema maparen kar lemsatepdang, tongtibangtibaji anema aliba luyim tsütsü (healthcare) inyaktsü, education aser lanur mapa munguba tebilemtsü atema skill development tsütsü temulung agütsütsü, tongtibang nüngdakbatem (infrastructure) aser lokti putepa alitsü atema inyaktsü, ta ashi. “Election nung madokyonga item atemaji inyaktsü”, ta paisa shisem.
Sentong nung PCC Nagaland Vice President Jonathan-i jembidang, 2003 election nung Naga yimden tebilemtsüji ita asem tsüngda solution bener arutsütsü, ta nangzük saka tanü tashi solution munguteter. 2008 sorkar mapang road show sentong tapu balala ayonga sorkar senpong lalushiponga intok aser iba jagi nübur nem tajangzük kecha bener marutsütet aser 2013 sorkar kümsükbo Kaziranga nung dang mapang teimba intok aser 2018 election nunga “change is coming” ta yimyim ayimoktsü saka mapabo kecha maka, ta metetdaktsü.
Taruba central sorkarji Congress majority nung akümtsü. Aji oda, Congress-i aniba sorkarji kodang arudir, hopta ana mesüra ita ka tsüngda nung tang aliba PDA sorkar ya subotsü balaka melentoktsü, ta paisa ashi.
Nagaland nung “Congress party asentenshibaji 26 Aonglenden Assembly Constituency aser Ungma nungi tenzüktsüla aser ibaji Congress asentenshiba nung otsüsütsü ka asütsü,” ta paisa ashi.
Congress party-i Naga nunger atema mapa tajung aika inyaka lir, anungji itemji mamatoki Congress candidate nem vote agütsütsü asoshi paisa mepishia metetdaktsü.
Alem Jongshi ya Ungma nunger Tsükjemsowa Longkumer aser Bendangsenla Jamir na jabaso lir. Pa temeim kinungtsü Lipokzenla Jamir tena nem jala ana aser jabaso ana moaja lir. Pa Fazl Ali College nungi B.A Honours nung graduate asü aser NEHU nungi M.A (Political Science) renem. Pa 1989 küm Nagaland Civil Service (NCS) nung ai aser 2017 küm Additional Secretary tashi inyaker sodi agi. Pa lanuwa nungi lokti tentet tapu balala nung tenzüka aruba nübo ka lir.