Ajak kasasa tongtibang

Atangji nisung ajak ya kasasa tongtibang saka peisasa kanga ulua bilemba agi aiben maparen aika nung lenirtemi nübortem nem timtem agütsür. Tatishitsü ka, India nungsa süaka talisa Nagaland nung Minister mesüra MLA-temi kanga ulua bilemer, anungji parnok senzüba gari atemabo kecha ozüng mali, mashi tesem nung mashilen nungi asüyonga ajateta aotsü. Anungji, nisung shiranger koda masü bener ooya aliyonga minister mesüra MLA süra tangar garitem ajaki lenmang aitsütsüla. Aji oda, aiben nübortemi lenmang aitsüa alidang yimsüsürtemi nübortem dak auyi ponglokja mesüra motzü seplokja ajateta aoba aikati ajangshir alitsü. Atangji, yimsüsür asünungji kanga tongtibang saka parnok tongtibangji nübortem nüngdak reprangja ketdangsüba nung tongtibang ashi, peisasa pei dang nungi tuluba bilema lenmang nung dena nübortem nem timtem agüja senzütsü asoshi tongtibang masü. Ibaji yimsüsür aser tulurtemi angatettsüla. Iba tangatetba nung tang Punjab nungbo Congress teloki aniba government tasenba kümer külen, mezüng kilonser tazüngpur senden nung Chief minister Amarinder Singh-i anir minister, MLA aser government nung tongti ketdangsertem shinga gari kolak nung light temerem (red beacon) meinoktsü telemtetba agiogo. Ashiko, asen lima nung asübo Chief minister-i anir minister, MLA aser tulurtem gari kolak nung light temerem longdakja mesenzü nungbo yimsüsür-a masü amato bilemtsü südi. Aiben asenoki yimsüsür aser ketdangser (officers) akümba ya nübortem tenzüktsü asoshi masü saka nübortem nem tenzükdaktsütsü asoshi aküm amai bilemer. Aji oda, asenok yimsüsür mesüra ketdangser kümer gari kolak nung light temerem aliba ka den body guard ngura, ibaji alima nung tematiba jenjang ngur mapa atem amai bilemer. Iba amaji peisasa pei ulua bilemba agi aser tangar dang nungi nisa tongtibangba (VIP) ta bilemba agi, nübortem tenzüktsü shim ser nung nübortem tenük agi mangur. Aji oda, kecha mapabo inyaktsütsü masü ser nung tesem ka nungi kati aodang gari metsü semer nung nisung noklang junga mener police gari ana asem whistle apua anidakdaktsübaji peisasa pei kanga ulua bilema asükümba tamaitsü asütsü. Punjab nungbo gari kolak nung light temerem meinoktsü lemtetba dang masü saka tang nungi sen crore aika alang mapa (project) asüyonga Chief minister mesüra minister shingaia ‘foundation’ long mazüngtsü aser mapa renemer tesemzüka mesemzüktsü saka mapa inyakba tesem nungji “iba mapa ya nübortem sen agi yanglu,” ta dang zülua ayutsü. Iba denji küm shia January ka nü yimsüsür shiai pei akaba ali rongsen ajak tenüng zülur assembly office nem agütsütsü aser Chief minister dena shiba südir süang nübortemi okadak ken o benoka asüngdangtettsüsa ozüng tasen ka yanglutsü. Punjab government nung Chief minister-i anir kilonser tazüngpurtemi item ozüng tasen renemba jagi parnoki par lima nung peisasa ajemalua aser ochishia nübortem tenzüknüba jakla angur. Iba ama ajemalu shisatsü tajung aser temerük angudang, asen lima nunga asenok ajaki parnok jiluji ajizüka inyaktet asübo ta bilemer. Atangji, nübortemi yimsüsürtem shimba ya gari kolak nung light temerem pereta bodyguard anir lenmang nung nisungtem ajateta asüküma senzütsübaji masü saka akok tashi government sen meindokdaktsüi ajemalua tetsüng agi asüyonga nübortem tonga oagi parnok shisabolu, timtem aser nüngdak lemsatepa anepaludaktsütsü asoshi shimba lir. Tanübo, asen lima yimsüsürtembo temeneptsüla masü karaa senzür aser ki tongerbo gate shibanger, anungji nübortemi parnokji tangua mangur aser parnokia nübortema mangur. Aji oda, kasa state nungsa süaka yimsüsür aser ketdangsertem o nübortem na alima balala nung alir ama liteper. Jungjunga bilemdangra, nisung ajak kasasa dang, shinga balaka tongtibangba masü, ajak tongtibang saka mapa agi bendangerba dang lir. Anungji, tang nungibo asenoka lokti senden nung VIP ta zülur mamshitsü aser yimsüsür aser ketdangsertemia peisasa pei kanga ulua bilema nübortem ajurui alilenia malutettsüsa mesenzütsü tangatetba tajung kati arutsü kanga nüngdaka kümogo.