Ajak tesülen tokjang

Aser Pai parnok dang ashi, Kü sülen anidakang aser Ni nenok nisung apurtem kümdaktsüdi. – Mathi 4:19

Yohani Yisu baptitsür külen, pai nütsüng ana dang Yisu kong lir metettsü asoshi pa sülen aotsü ashi. Ana rong nung kabo Andria liasü. Yisu ajurua Pa den jembir külen Yohani parnok dang Khrista sayu ta parnoki angatetta aru. Idangjisa Andriai teti Simon Yisu dangi anir aru. Tesülen Yisui ango pur adianu ana dang “Kü sülen anitakang” ta ashi. Pai parnok dang parnok akaba ajak tesülen yujang ta parnok tajangzük anguba mapa, parnok chiyongtsü aser parnok tebua- parnok Pa nütsüngtem akümtsü asoshi. Idangji Yisui parnok koda amshitsü parnok dang ashi. Pai parnok temetetba ango bushiba nung masü saka nisung tanelatem bushiba nung amshitsü ta parnok dang ashi. Tesüiba nunga parnoki Yisu ajurua liasü aser Pa kechi koma nisung parnoki metetta liasü, Pa sülen anidakra Pai parnok taküm teti asoshi melenshitsütsü parnoki mulungtet.

Asenok asoshi lessonji tanabuba tekong nungjia sayur. Idangyongjisa parnoki parnok zütsük toktsü aser Pa sülen anidak. Parnoki Yisui ajaba nung tashi anga, parnok akaba ajak toktsü. Tanü Yisui asenok shia ajar. Tanü Pai asenok tejangraba toktsüdaktsüner aser Pai asenok taküm agütsüba nung ranglokdaktsüner. Iba nung shilemji shirnoki Yisu memeteti lir parnok Pa den teti tatem maka taküm aliba osang tajung lemsateptsübaji lir. Tanü na aser ni nisung apur akümtsü akok. Tasüngdangbaji ya, asenokia Andrew aser Peteri ama, idangjisa Pa sülen anidaktsü shimtettsü asü?

Tsüngrem, tanü ni nisung apur ka asütsü Ne dang sarasademer. Ne taochi aser yimlibilem lemsateptsü mapang tajung agüjang. Amen.