Ajaki melunga Tir candidate meshimra onoki telemtetba agitsü: Opposition

New Delhi, May 26 (Agencies): Hokolbarnü Opposition party temi, Tir election atema BJP den melungtepa Tir candidate ka shimtsü mekokra opposition-i telemtetba ka agitsü, ta metetdaktsü.
Tang teinyakdak Tir, Pranab Mukherjee kümsük July ita nung tembanger.
Tanü Congress Tir, Sonia Gandhi-i BJP nung madenba party tem senden ayonga liasü, aser iba senden nung opposition party 17 aden.
Iba senden dak sendakba nung opposition party temi sangdong ka ajanga, “Tir aser tatong Tir menden atema election agitsü mapang ana nung lir. Teti agia sorkar tashi nung aliba party-i ketdangsüa tenüngtem benoker. Tang tashi nung iba atema osang kecha mali. Party ajaki agizüktettsüsa candidate mesangdongra, onoki- asen linük temzüngtem nung aliba ama inyaktsüsa candidate shimtsü,” ta metetdaktsü.
Tir aser tatong Tir election na dak alia opposition-isa, BJP sorkari sensakertem timtemdaktsür aser Jammu & Kashmir nung tensa tamajungba kümdaktsür, ta aitsü.
Opposition party tem sangdong nungsa, “Sorkari mapatong balala ajanga asen nüburtem, aluyimertem, mapa inyakertem, lanurtem, SC/ST tem, minority tem aser lokti nung tepetzük tia nung alirtem nem khuret tali agütsüba anema Parliament nung opposition party tem longjemer nokdaktsü. Jammu & Kashmir nung tensa tamajungba akümba atema opposition party temi tebilemtsü akar,” ta shia lir.
Senden tembangba sülen osangbenertem den jembidang Congress lenir, Ghulam Nabi Azad-ia, tang tashi nungbo telemtetba agia mali, ta metetdaktsü.
“Ajaki (sorkar aser opposition) agizüktettsüsa nübo ka shimtsü mekokra onoki telemtetba ka agitsü,” ta paisa ashi.
“Inyakyim nung sorkar tashi nung aliba party-i ketdangsüa candidates tenüngtem (Tir aser tatong tir) benoker,” ta Azad-isa ashi.
Tanü Sonia-i ayongba senden nung West Bengal Chief Minister Mamata Banerjee aser Rashtriya Janata Dal tongti, Lalu Prasad na densema opposition party 17 nungi lenirtem dena liasü.
Bihar CM, Nitish Kumar jelia sentong yanglua aliba ajanga pabo iba senden nung medentet.