Ajaki telatetba yakta aginer

NSCN-IM o India government na tsüngda August 3, 2015 nü renemba ‘ Framework Agreement’ nung ajemdaker ken o jembiba maparen nung ya Naga yimten telok ajak külemi longjemer nungit nungbo jungla ta tan India nüchiso anguba anogomong nung Nagaland government tenüng nung jembiba onük nung metetdaktsüba jagi Nagaland government tangatetba sayuogo. Iba o jagi Naga nunger linük tenzüker telok ajak longjemer tang NSCN-IM o India government na tsüngda o lemtepya aliba maparen nung shilem aginung tajungba asütsü ta angatetdaktsüner. Aji oda, Naga yimten telok ajak longjemer NSCN-IM telok o India government na tsüngda ken o lemtepba maparen nung nungittet nungbo, iba jagi asür Isak Chishi Swu nem tapet aküm agütsür süla ta Nagaland government-isa metetdaktsüogo. Idakji kecha temulung nung langka rema yur jembiba mali. Ajisüaka, ibaji jembiba o dang nungibo mapa küma inyaktsü kanga agia tasakba lir. Atangji, Naga yimten nung linük tenzüker teloktem aika liaka tang tashibo India government den Naga yimten tebilemtsü ken o benoka jembiba telokbo NSCN-IM telok dang lir, anungji tangar telok dang nenoka parnok den külemi ken o jembidak shilem agiang ta ashitsübaji melamelar amai saka mapa akümtsü kanga tasak asütsü. Tangar telok ajaki NSCN-IM telok dang August 3, 2015 nü renemba “Framework Agreement’ nung koma zülua lir ta asüngdanger, saka tejangjabo shingaia mashir. Ibaji kechiba mesayur aser mashir, iba kulijibo sign asürtemi dang metet, anungji sayu nung tajungba asütsü asü masüar, ibajibo mapangi dang ashitsü. Ajisüaka, tang tangbo Nagaland government-i aginüba amaji tangar teloktemi NSCN-IM o India government na ken o jembiba nung oa adentsübaji tasak asütsü. Atangji, Naga yimten tebilemtsü tatem küma latettsü asoshi Naga nunger linük tenzükertem telok ajak telongjem aser shisatsü nüngdaktsü. Anungji, linük tenzükertem telok ajak külemi tebang ia telatetba kati arutettsü asoshi NSCN-IM teloki tanga tanüngba Naga nunger linük tenzüker teloktem dang temulung lapoka o ka ashitsüla lir. Iba o ji, Naga yimten temeten bushitsüba mapa ya Naga nunger telok ka kisüng mapa masü saka ajak khuret aser ajak mapa, anungji telok ka kijaibo ajaki agizüktettsüsa telemtetba bener arutsü kanga tasak, anungji arung külemi jembidi ta ashitsüba ken o asütsü. Iba ama o kaji NSCN-IM teloki ali nung metsükdaktsü tashi Nagaland government-i shiaka aser tangaria shiaka mapa küma moutettsü. Aji oda, küm 19 tashi ajurupet ajurua jembiaka, Naga yimten tebilemtsü melatettetbaji ken o tasak asüba kija agi masü saka Naga nunger melongjemtetba ajanga lir. Atangji, Nagaland government-i taküm India nüchiso anogo nung ashiba ama, Naga nunger yimten tebilemtsü ya nisung ajaki yaktasa latetner. Ajisüaka, nübortemi yongyaba agi masü saka tejembirtemi tangar koka jembitet nung dang yakta telemtetba kati arutettsü. Aji oda, tang tashi NSCN-IM o India government na tsüngda telemtetba kati marutetba tetezüji NSCN-IM teloki India mulung koka mejembitetter. Ibaji tangatet dang, kechiyong Naga nunger melongjemba ajanga nungittsü melen aitsür aser yaritsü melen anema apusor teimba-teimba akümer. Tanü Naga nunger meputeptetba tensa tia aser temulungjang ya memelen tashi India den Naga yimten tebilemtsü ken o tatem küma jembitsübaji kanga tasak asütsü. Kechi mapa nung südir süaka takok angutsü asoshi taremzük aser shisa talang nüngdaker. Ibaji NSCN-IM teloki tama sayutsüla aser Nagaland government-i Naga nunger linük tenzükertem longjemdaktsütsütsü mekokra, NBCC-i ano khen merangdangtsüla. Tanü Nagaland government mapaji Delhi nung masü saka Kohima nung teimba aser tuluba lir. Kohima nung longjemdaktsütetra Delhi nung jembishinü melarmelar asütsü saka Kohima nung külemi majurutet tashi Delhi-i aobaji amajok nung nübo atsükba dang asütsü. Joko, ajaki telatetba yakta aginer asünungji Naga nungertem ajurutepa tajungba ka jembitsübaji Naga nunger telok ajaki mulungtsüla aser ajuruteptsüla.