Ajantha Mendis asaya nungi anentsü

Luroi/August 28, 2019 (Agencies): Sri Lanka nunger bowler Ajantha Mendis, shibai pa indang ‘carrom ball’ aser tanga variations balala ajanga alima ajunga bangkadaktsüogo, pai cricket asaya ajak nungi anentsü sangdongogo, ta BBC Sinhala sangdong ka ajanga metetdaktsü. Pa arishi küm 34 jungogo aser Sri Lanka team nungi tatemsa 2015 küm asayaogo.
2008 küm Asia Cup Final nung run 13 agütsür wicket 6 agiba ajanga Mendis ajaki jangja bilemteter. Iba sülen pa India den mezüngbuba Test asaya aser asaya asem nung pai wicket 28 agi liasü. “Ni tarutsü spin bowling nguogo aser pa tenüngji Ajantha Mendis lir,” ta cricket writer Rob Steen-i ashi.
Mendis-i ODI nung wickets 50 takaratiba agi liasü. T20 nung wicket trok anaben tashi agir asayar rongnung pa kija lir.
Mendis, Sri Lanka tenüng nungi Test asaya 19, ODI 87 aser T20 39 nung asayaogo aser iba mapang pai Test wicket 70, ODI nung wicket 152 aser T20 nung wicket 66 agiogo.
Pa taküm Sri Lanka domestic cricket nung asayaogo. Pa Premier League Tier B nung Police Sports Club captain liasü. Pa bowling kangabo maoner saka team nung batsman ka ama asayaogo.