Ajay-i pei sasa pei stunt aitsü Sanjay Mishra ajungmeso

Aenjeti/January 21, 2019 (Agencies):Ajay Devgn, shibai action film tem nung pa indang stunt tem aitsü jangrar pai Total Dhamaal co-star Sanjay Mishra dang pasasa pa indang stunt aitsü ajungshia liasü.
Sanjay ajungmesotsü asoshi Ajay-i mapang tatsükabo agia liasü saka film yanglur Indra Kumar teyari nung Masaan actor dang pasasa pa indang stunt aitsü ajungmesoteta liasü.
Rehearsal dak atemer Ajay-i Sanjay nem stunt tem idakja liasü koba tatem nungbo film nung shilem ka aküm.
“Iba film ya adventure comedy ka asünung onoki action ya jenjang tajungba ka dangi ajungketnüa liasü aser iba den stunt-a tajungba aginüa liasü,” ta Kumar-i ashi.
“Ni film nung shilem tem agiba mapang Sanjay atsüayonga liasü saka Ajay-i pa süngjemshidaktsü aser pa indang stunt aitsü ajungmeso iba sülen ni pa den mapang talangka sensaksemogo. Künaprongla senteper iba shot agitsü pa ajungmeso.Tang mezüngbuba pai iba amala action shilem ka agiogo saka tatem nungbo kanga takok nung tembang,” ta film director aser co-producer Kumar-i ashi.
Total Dhamaal ya Dhamaal film rongnung tasembuba lir kong mezüngbo Arshad Warsi, Javed Jaffrey aser Riteish Deshmukh nungeri tongti shilem agi. Iba film nungsa Madhuri Dixit Nene, Anil Kapoor aser Boman Irani nungeri tongti shilem agitsü.
Film ya Fox Star Studios, Ajay Devgn Films, Ashok Thakeria, Kumar, Sri Adhikari Brothers, Anand Pandit, Sangeeta Ahir aser Kumar Mangat Pathak nungeri co-produce süogo aser February 22 nü sayatsü renema lir.