Ajay Jayaram US Open semifinal-i iogo

El Monte, July 09 (Agencies): India nunger badminton asayar mongin, Ajay Jayaram-i par quarterfinal asaya koka tang tasayadak US Open Grand Prix badminton asayamong tebur singles semifinal asayatsü jenjang yashi, Hokolbar nü ajangzükogo.
Tebur World No. 22, Jayaram-i points 21-11, 21-11 ngua külem sensopur, Anand Pawar madak takok angu.
Tan asayamong nung 4 buba jenjang abener, arishi küm 28 tain Jayaram-i Japan nunger Kanta Tsuneyama den semifinal asayatsü lemzükogo.
Jayaram-i takok ngua jenjang tajung nguaka, külem sensopur, Manu Attri aser B Sumeeth nati par tebur doubles asaya nung tamakok ngua, tan asayamong nung joko toktepa shilem magitettsüsa jenjang tamajung ajurua liasü.
Japan nunger Takuro Hoki aser Yugo Kobayashi nati  minute 52 nung points 21-18, 7-21, 16-21 ngua Manu o Sumeeth na quarterfinal nung tsükdaktsü.
Ano, America tsür, Paula Lynn Obanana aser Eva Lee natia points 21-15, 21-12 ngua, India’er tetsür doubles asayar, Poorvisha aser Meghan nata semifinal asaya nung tsükdaktsüba osang jangjaogo.