Ajemalu tulu noksa. Mathi 8:5-13

Idaki asenoki aochia aria bilemba angur, nisung ka shirang aser tangar ka timatem. Tangar timtem nung asenoki aria bilemba jagi asenok Tsüngrem dangi tali anasai aor; timtemer nüngdak asenoki Kibuba den lemsateper. Asenoki alima shirangba aser timtem ajanga asen taginüba Kibuba den lemsateptsü akok. Asen Tsüngrem ji “Aochia bilemba Tebu” lir; ajaklen Pai metetta lir, kechalena ola madoki malir; aser asenoki Pai aginüba nung meimchir nüngdak ayimtenba asenoki angashir.
Iba Lai nung asenoki ajemalu taochi angur. Asen asükümi teti asen Kibuba lemang shibanger. Asenok ajemalu agi asenok Tsüngrem dangi aotsü tapok lapoktsür. Tanela nung ajemalurtem Tsüngrem yimli nung alir, aser Tsüngrem yimli taochi ain parnok nem agütsür.
Aser yangi asenoki tamang taochi angur. “Oji dang shiang!” Noklang madak kiburi Kibuba oji Kibubai mulungba inyaker sepoytem ama agizük. Kati jembir aser idangyongji tenyaba mapaji inyaker aser aji oda lir. “Ni nenok den jembiba otem tanela lir aser parnokji taküm.” Yisui jembiba otemji taküm o lir. Pa otemji ain abenba talungtsütem lir, aser kodang Pa O tem jembidir sayatenya teti inyaker. “Nai jembiba o jagi tangar nem tesangwa agütsür.
Kotak Obala, tanü ni jembiba o agi tangar mulung sangwadaktsütsüsa Ne O agi kü mulung nunga lidakjang. Amen.