Ajentsü asü, odang asütsü ?

Dimapur nung alir ka dakbo covid19 tashidak agi tongogo, saka asenok tia ajungtsüji paji oagi Gauhati nung anepaludagi aser pa ajanga tashidak menababo tang tashibo puteta mali. Ajisüaka, yangji kecha molung anisüngzüktsü mali, kechiyong iba tetsübutsü tashidak nungi asenoka jenbua mali. Mapa ajak agi asenoksasa asenok kümdanga alitsüba dak alaka , asüng nungi danga mapatem shitak küma meinyaktetra, tanü tashi government-i renema akaba mozü kidangbo anepalur junga mangutsüba tensa tia ka nung lir.Asenoki osangtsüsang tapu balala ajanga Covid agi shirangertem anepalutsü pur doctor-tem asoshi bener aruba süoshitem shitak masüba osang angashigo. Ano aji tatem masü, yashiang Dimapur nungbo ambulance gari anishirtemia parnok shirangertem bener jajaba mapang parnok dak nungi tashidak memenatsüsa süoshi aser taküm nüngdakbatem ajak shitak agütsütsüla ta takangba agüja yimjak nung longkak aita sayuogo. Ano ajia tatem masü, yashisa Dimapur District Hospital nung inyaker nurse-temi parnok Medical Superintendent dangi yokba shidi ka nung, parnok nema Covid19 agi shiranger anepaludang sübotsü atema nüngdakba süoshi ajak agüjang aser ano temelung melemtetba nisung aser shirangertem dak nungi azü tuzüktsü asoshi zünga shia metetba Lab technician dang yokang, onokibo item shirangertem dakji mekongshitettsü ta shia aliba onüktem jagi asenok, shitakba, Covid 19 tashidak wara anema raratsü renema ali asü maliar sayur. Atangji, kasa tebilemtsütemji Nagaland nung tanga mozü kitem nunga alitsü. Yashi yakanü Ao Senden lenirtemi Assam artsülen aliba Aor yimtsüngtem sema jajaba mapang, parnokia PHC aser sub Health center-tem nungbo tanga süoshijibo yutsür teka shidokba sanitizer aser teni tebang nembangba mask den maka, tashidak wara pateka den ya raratsü ataba ngua kanga shisabolua bilemba osang ka metetdaktsüogo.Atangji, lokti tentettemi mesüra osangbenertemi nüngdak reprangteta yimjak nung government dang tuteta mashiyonga, tang mapangba yabo mozü ki tapu balala nung shiranger anepalutsü purtema tangar nüken tsübua pei nüngdak mashi ayutsüba mapang masü, kechiyong ibai tasü o taküm na tsüngda obendangdak nokdaker amai lir. Junga merenemi shiranger anasai aoba aser kongshibaji tasütsü bushia aoer amai lir, anungji jungjungaa zep ta renema melira, nüngsen agia asüyonga ola adoktsüla aser sarasadema nüngdak ajak jungjunga renemtsüla. Iba amaji ka mesüra shiranger bener aruba mapang ajentsü asü, odang külemi süa adoktsü ta asüba mapang ajurutsü ana nung lir. Joko, tashidak asen lima tongogo, ibai yimbazüa tiyazü jembia kazü dang masü. Iba tashidak nungibo shinga jenbua mali. Tulurtemang tama atongtsü aser tilartemang tia makaba asütsü. Iba tashidak nungibo, renema melira, jendi asüyonga jenbula masü. Ibayongji, asenok ajak pei pei inyaktsüba maparen nung shitak inyaka atatsü kanga nüngdaka kümogo. Tang amato nübortemia governemt-i teyuba nung tashi angaa anidaktsü aser government nung alirtemia pei senpong nungi dena agiteta mozü kidang shiranger yarirtem aser shirangertem asoshi nüngdakba ajak shitak renemtsütettsüla. Junga merenem ser nung junga renema lir ta shira, ibajibo tangar asoshi dang masü saka peisasa suseta asütsü renemer amai asütsü. Atangji, tanü tashi nunga kanga meranga renemtepdagi saka asenok mozü kidang yipten anasemka yur mulung anisüngzüka kazüdang masü. Ibai asenok asoshibo mozü kitem tasen küma yangluba mapang tajung ka südaktsütsüla. Aji oda, Covid tashidak ya District Hospital aser Community Health Center ajak nung anepalutettsüsa tangsa tang arsangokja yangluyonga aotsüla. Iba ama mapang ya shiranger anepalutsür purtem asoshia Health Service nung inyakbaji Tsüngrem tenzükba mapa nung inyakba den kasa amato bilema, temeim agi, pei mapa nung tali temulung agüja inyaktsü asentenshiba mapang ka asütsüla.