Aji ni asü, Kibuba ?

Asen kümtetdakba Yisu Khrista asenok meimchirtem menen asoshi kangki nung angenloktsü mapang anasa atalokbatem rongnung temenungratsü aser temulung ashitsü tatalokbatem rongnung kaji, Pa nütsüngtem den tangar ka kidang temaba takdang nung kümtettsü benjong chiyongba mapangji liasü. Iba aonung ya Yisui mapang tatsüka lir külen parnok dak ataloktsüba indang Par nütsüngtem dang indangindanga ashiba o tasak ana Mathi 26, Mark 14, Luke 22 nung shia angur. Kaji, taonung “ nenok rongnung kati ni ashioktsütsü,” aser ano kaji, “taonung nenok ajak kü dak metsüdaktsü.” Iba aonung Yisui Pa nütsüngtem den chiyongdang ashiba o tulu ana ya, tanü asenok taküm aser asen tamang den medemdanga angatettsü merangtsübaji kanga tongtibang lir. Iba mapang yabo Yisu nütsüng terana dang liasü saka tanübo asenok ajak ya Yisu nütsüng lir. Aji oda, Yisui tanüa asenok dang nenok rongnung memenui kari ni ashioktsütsü ta ashika asünunga, asenokia komaka bilemla aser langzüla ta bilemer. Yisui Pa nütsüng ter ana dang kasa o ya ashidang, parnok ajaki “ Kibuba, aji ni asü ?” ta asüngdangtsü tenzük. Nütsüngtem telangzüba ya azüngdang, kechiba parnok rongnung shingaia nebo na mashioktsütsü, ta meshitet ta bilemer. Atangji, nütsüngtem küm asem tashi Yisu den külemi tensa tajung tamajung tia ajak nung jajaa arur, iba kümtettsü benjong chiyongba aonung ya tesüsaba tatidang (final exam) agiba mapang amato ka liasü. Idangji, Yisui parnok dang nenok ajak iba tatidang nung tamakok angutsü ta ashiba amato ka lir. Nenok ajak tatidang nung tamakok angutsü ta tesayuri ashidang, kaketshirtem rongnung katia, tesayur, nebo akoktsü ta meshitetba tetezüji, parnok shinga renema mali asü. Kibubai nütsüngtem dang nenok ajaki ta masü saka nenok rongnung kati ni ashioktsütsü ta ashidang, nebo na kodanga mashioktsütsü ta meshitetba tamang jagi tangari Yisu pua bener aodanga menokdaktet. Iba tamang jagi Yisu tangar ket nung züka merenshidang, hau ni Par nütsünga ta meshitet. Atangji, Yisui nütsüngtem dang taonung nenok ajak kü dak metsüdaktsü ta ashidang, Peter-iang nebo kodanga memetsüdaktsü ta ashiba angur saka metsütsüi Yisui ashiba ama metsüdak aser pai pasasa pa Yisu nütsünga ta kilitsür tsüngdanga menangzüktet. Yisu nütsüngtem Pa sülen sayatenya mapatem inyakba ajak ajangshia jajaa arur, Yisu pua kangshiba mapangbo Yisu nütsünga ta ka mesünüi akümba amato, tanü asenok küm papiga ya amanga arur Yisu yimsü anemba telokang tesashiba aser telongsoba aküm dang, asenok ishika dang süaka asenoki asenoksasa Yisu nütsünga ta meshitettsüsa lira, iba tangatetba jagibo Yisu ashioktsütsü. Aji oda, tanü Yisui asenok dang nenok tang anogo shia yamai kü den jajaaka, kodang election arudir, nenok ajak kü dak metsüdaktsü, kechiyong election mapangbo nenok asoshi niji mesadem temetsüdaktsü süng long ka agi nokdanga ayu ama asütsü ta shidar amato bilemdi. Aji oda, tangari Yisu mezüngmeshitsü tenzükdang, Peteri Yisuji pa kibur aser tesayur ta menangzüktetba ama, pen tera kirak nung aser tiyazü o ka jembi nung, kodang asen taküm nung senotsü tajangzük tuluka agutsüsa mapang ka asenoki ajurudir, asenoka Peter amaji Yisuji temeteta memetet amai kümadoker. Aji oda, kodang election arudir, ashiko, Yisu nütsüngi Pa sendokba amaji, arogo tenzükertema tenzükba mapa nungia anentsü, kechiyong Yisuji election mapang asenok asoshi temetsüdaktsü akümer. Iba ama alima yimten tashi raktepba aser rongsen bushiba tensa mapang ka nung, Yisui asenok dang nenok rongnung kati ni ashioktsütsü ta shira, asenokibo Kibuba, aji ni asü ? ta masü saka Kibuba, imlibilema aji nibo tesüdaktsüma, “ kü dang aochiang,” ta T.Ken 57 nung David-i Kibuba dang ashi ama aser Luke 18 nung Yeriko lenmang nung nükpoksangi Yisu dang ashi ama, kanga kukua sarasademtsüla. Yisui asenok tashimait, tamang tila aser terata tia ajak ya meteta lir, anungji Pai iba ama sarasademba mulungjangji aginür. Kangki nung auersang sarasademjia kasaji liasü.Tanüa asenoki Kibuba Yisu dang, auersangi sarasademba ama, ni auyaogo, ni ochimashi inyakogo, ni aibelenogo, anungji kü dang aochiang aser nü yimli arudang nia bilemtetangma ta  shidi.